Kólik polıtseıleri bıylǵy 5 aıda 1 tonnadan astam esirtki zattaryn tárkiledi
ASTANA. 26 maýsym. QazAqparat - Búgin, ıaǵnı 26 maýsym - Halyqaralyq nashaqorlyqqa qarsy kúres kúni. Aıtýly sharaǵa oraı, Kóliktegi ІІD Esirtki bıznesine qarsy kúres basqarmasynyń qyzmetkerleri Astana stantsııasy temirjol vokzalynyń aýmaǵynda Kınologııalyq ortalyq qyzmetiniń kómegimen «Nashaqorlyqqa jol joq» atty arnaıy aktsııa uıymdastyrdy. Bul týraly Kóliktegi ІІD baspasóz qyzmeti habarlady.
Vedomstvonyń habarlaýynsha, aktsııanyń basty maqsaty - Halyqaralyq nashaqorlyqqa qarsy kúres kúnin atap ótý, salaýatty ómir saltyn nasıhattaý. Memlekettiń tiregi bolyp tabylatyn jastardy jat qylyqtardan saqtandyrý, deni saý urpaq tárbıeleý.
Aktsııa barysynda kelgen-ketken jolaýshylarǵa aqparattyq-túsindirý jumystary júrgizildi. Olarǵa býkletter men broshıýralar taratylyp, naqty keńester berildi. Sondaı-aq, qyzmettik izdestirý ıtteri kóliktegi temirjol nysandarynda esirtki izdeý qalaı júzege asyrylatynyn kórsetti.
Kólik polıtseıleri bıylǵy 5 aıda 131 esirtki qylmysyn anyqtady. Qyzmettik jumys nátıjeleri boıynsha Kóliktegi ishki ister departamenti bólinisteriniń qyzmeti arqasynda esirtki qylmysy 24 paıyzǵa, onyń ishinde satý faktisi 39 paıyzǵa tómendegen. Esirtkini kontrabandalyq jolmen tasymaldaýdyń 11 faktisi anyqtaldy, olardyń barlyǵy boıynsha qylmystyq ister qozǵaldy.
Zańsyz aınalymnan 1 tonna 118 keliden astam ártúrli esirtki quraldary alyndy, onyń 12 kelisi geroın.
