Kólik polıtseıleri 30 myńǵa jýyq quqyq buzýshylyqty anyqtady
NUR-SULTAN. QazAqparat - Kólik polıtseıleri osy jyldyń basynan beri elimizdiń áýe jáne temir jol kóligi nysandarynda 29 895 ákimshilik quqyq buzýshylyqty anyqtady, dep habarlaıdy QazAqparat tilshisi.
Kóliktegi polıtsııa departamentiniń bastyǵy Ońal Bekıevtiń aıtýynsha, 15 qyrkúıek kúni Pavlodar stansasynyń polıtsııa bólimi qyzmetkerleri «Semeı-Nur-Sultan» baǵytyndaǵy jolaýshylar poıyzynan poıyz bastyǵynyń aktisine sáıkes bir jolaýshyny túsirip alǵan.
«Mas bolǵan azamat poıyz jolseriginiń eskertýin elemeı jolaýshylardyń mazasyn alǵan. Vagon tambýryna shyǵyp, zańsyz ári qajettilik bolmasa da stop-krandy tartyp qalyp, jolaýshylar poıyzyn toqtatqan. Kólik polıtseıleri tekserý barysynda Semeı qalasynyń 25 jastaǵy turǵynyn anyqtady. Medıtsınalyq kýálandyrý qorytyndysyna sáıkes, ol alkogolge «orta deńgeıde« masań kúıde bolǵan. Quqyq buzýshyǵa qatysty QR Ákimshilik quqyq buzýshylyq kodeksiniń 440-baby 3-tarmaǵy jáne 560-baby 1-tarmaǵy boıynsha eki ákimshilik hattama toltyryldy. Oǵan 13 890 teńge mólsherinde aıyppul salyndy», - dedi polıtsııa polkovnıgi.
Kóliktegi polıtsııa departamenti baspasóz qyzmetiniń málimetinshe, temir jol qaýpi joǵary aımaq sanalady. Osyǵan oraı departamenttiń polıtsııa bólimderine temir jol kóligi nysandarynda júrgen 1 344 jasóspirim jetkizilip, onyń 50-i Kámeletke tolmaǵandardy beıimdeý ortalyǵyna ornalastyrylǵan. Túnge ýaqytta eresekterdiń qaraýynsyz dalada júrgen jasóspirimder úshin 199 ata-ana QR Ákimshilik quqyq buzýshylyq kodeksiniń 442-baby 2 tarmaǵymen ákimshilik jaýapqa tartylǵan.
