Kólik polıtseıi AQSh-taǵy Búkilálemdik oıyndarda kúmis júlde enshiledi
ASTANA. QazAqparat - Qazaqstan Kólik polıtsııasynyń qyzmetkeri AQSh-ta 67 eldiń polıtseıleri qatysqan Búkilálemdik oıyndarda kúmis medal ıelendi, dep habarlaıdy Kóliktegi ІІD baspasóz qyzmeti.
12 tamyzda Los-Anjeles qalasynda grepplıng boıynsha polıtsııa qyzmetkerleri arasynda ótken dúnıejúzilik oıyndarda QR ІІM kóliktegi ІІD-iniń qyzmetkeri polıtsııa podpolkovnıgi Talǵat Qojabaev 125 keli salmaq dárejesinde júldeli ІІ orynǵa ıe bolyp, kúmis medal aldy.
Álem chempıonatyna 67 memleket qatysýda. Jekpe-jek nátıjesi boıynsha І oryndy -Reseı, ІІ oryndy - Qazaqstan, ІІІ oryndy AQSh ıelendi.
Sonymen qatar, 11 tamyz kúni dzıýdo boıynsha polıtsııa qyzmetkerli arasynda ótken básekede Talǵat Qojabaev 100 kg joǵary salmaq dárejesinde ІІІ orynǵa ıe bolyp, qola júlde aldy.
Talǵat Qojabaev halyqaralyq deńgeıdegi sport sheberi, áleýetti qurylym arasynda úsh dúrkin álem chempıony, qazaq kúresi, sambo jáne dzıýdodan birneshe márte chempıon atanǵan. Іshki ister organdarynda 10 jyldan astam ýaqyt qyzmet atqaryp keledi jáne búgingi tańda kóliktegi ІІD-iniń arnaýly daıarlyq basqarmasynyń basshysy.
Aıta keteıik, 10-16 tamyz aralyǵynda AQSh-tyń Los-Anjeles qalasynda polıtsııa qyzmetkerleri men órt sóndirýshilerdiń búkilálemdik oıyndary ótip jatyr. 67 memleketten kelgen 8 myńnan astam quqyq qorǵaý organdarynyń ókilderi júlde úshin baq synasýda.
