Kólik óndirýshilerin qoldaýǵa 70 mlrd. teńge baǵyttalady - Májilis

ASTANA. QazAqparat - 2015 jyly respýblıkalyq bıýdjetten Qazaqstannyń kólik óndirýshilerin qoldaýǵa 70 mlrd. teńge baǵyttalady. Bul týraly búgin OQK ótken brıfıngte QR Parlamenti májilisiniń depýtaty Aleksandr Mılıýtın málim etti.

«2015 jyly kásipkerlik sýbektilerin qarjylandyrýǵa 75 mlrd. teńge qarastyrylǵan, onyń 70 mlrd. teńgesi - otandyq kólik óndirýshilerdi qoldaýǵa jumsalady», - dep atap ótti ol.

Depýtattyń aıtýynsha, «Nurly jol» baǵdarlamasy aıasynda 5 mlrd. teńge tehnıkalyq retteý arqyly ishki naryqty qorǵaýǵa baǵyttalady.

Eske salaıyq, QR Parlamentiniń májilisine 2015-17 jyldarǵa arnalǵan bıýdjettiń jańa jobasy túsken bolatyn. Onyń aıasynda qosymsha 700 mlrd. teńge únemdeý josparlanǵan. Olardyń basym bóligi memlekettik organdar men ulttyq kompanııalarǵa bólingen qarajatty qysqartýdy kózdeıdi. Áleýmettik salanyń qarjysy burynǵy deńgeıinde qalady.