Kólik nómiriniń tsıfry men áripterin óz betinshe qurastyryp alý múmkindigi berilmek

ASTANA. QazAqparat – Elimizde kólik nómiriniń tsıfrlary men áripterin tańdaýǵa múmkindik beretin qyzmet túri engizilýi múmkin. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın áleýmettik jelidegi jeke paraqshasynda jazdy, dep habarlaıdy QazAqparat tilshisi.

«Almatyda Mamandandyrylǵan halyqqa qyzmet kórsetý ortalyǵyna bardym. Іshki ister mınıstrligimen birlese joǵary suranysqa ıe avtokólik nómirlerin satý qyzmetin engizý boıynsha aýqymdy jumys atqarylýda.

Qazirgi ýaqytta qazaqstandyqtar mundaı memlekettik nómirlerge elektrondy úkimet portaly jáne eGov Mobile mobıldik qosymshasy arqyly tapsyrys bere alady. Ótken jyly otandastarymyz shamamen 6 mlrd teńgege VIP-nómirlerdi satyp alǵan. Bıylǵy jyly 3 mlrd teńgege 8 myńnan astam nómir berilgen. Maǵan basqa da arnalar arqyly qajetti nómirlerge tapsyrys berýge bolatyndyǵy týraly aqparat kelip jatady. Bul jaǵdaımen barynsha tanyspyn. Sondyqtan biz memlekettik nómirlerdi tańdaýǵa baǵyttalǵan qyzmetti engizý máselesin pysyqtap jatyrmyz», - deıdi B.Mýsın.

Mınıstrdiń aıtýynsha, kólikke nómirdi tańdaý qyzmeti arqasynda árip belgilerin de óz betinshe belgileýge múmkindik bolady.

«Mundaı fýnktsııanyń kómegimen klıent kez kelgen áriptik nómir belgilerin tańdaı alady. Mysal retinde alsam, satyp alýshy óz esiminiń alǵashqy úsh árpin engizý arqyly qalaǵan nómirine qol jetkize alady. Bul qyzmet túrine bizde úlken suranys bar.

Búgingi tańda mundaı qyzmetti júzege asyrý úshin joǵary suranysqa ıe nómirlerdiń tizbesin ulǵaıtýdy zańnamalyq túrde bekitýimiz qajet.

Osy oraıda, biz Parlamentten qoldaý tabamyz degen úmittemiz. Sebebi, osyndaı nómirlerdi satý arqyly bıýdjetke qosymsha qarajat túsiretin edik», - dedi vedomstvo basshysy.