Kólik mınıstrligin qaıta qurý qajet - Qanat Álmaǵambetov
ASTANA. QazAqparat - Qazaqstannyń kólik qyzmetkerleri odaǵynyń bas dırektory Qanat Álmaǵambetov kólik mınıstrligin qaıta qurý máselesin kóterdi, dep xabarlaıdy QazAqparat tilshisi.
«Qazaqstanda kólik salasy ishki jalpy ónimniń 8 protsentin alyp otyr. Degenmen, atalǵan kórsetkishti áli de arttyrýǵa bolady. Jaqynda biz Lıtvada boldyq. Ol jaqta kólik salasynyń úlesi 13-15 protsentti quraıdy. Biz de osy kórsetkishke jetýimiz kerek. Geografııalyq jaǵdaıymyzdy barynsha paıdalanýymyz qajet. Menińshe, búginde kólik saıasatyn úılestiretin arnaıy organdy qurýdyń ýaqyty keldi. Buny bıznes te qalap otyr. Atalǵan organ sheteldik kompanııalarmen jumys jasap, tranzıtti retteýi tıis. Sóıtip, júk tasymalyn arttyrýymyz qajet», - dedi Q.Álmaǵambetov Ortalyq kommýnıkatsııalar qyzmetinde ótken baspasóz máslıxatynda.
Onyń aıtýynsha, burynǵy kólik mınıstrligin qaıta jańǵyrtý qajet.
«Ol bizge aýadaı qajet. Jerimiz úlken. Osyny tıimdi padalanǵanymyz durys. Osy ýaqytqa deıin ınfraqurylymǵa biraz aqsha salyp, logıstıka jelilerin quryp aldyq. Endi, osynyń bárin durys basqaryp, tıimdi paıdalaný úshin arnaıy organnyń bolǵany durys», - dep atap kórsetti Q.Álmaǵambetov.
