Kólik mınıstrligi Qyzylorda-Kókshetaý poıyzymen ketip bara jatqan 98 «qoıannyń» ústinen tústi
ASTANA. 17 shilde. QazAqparat - QR KKM Kóliktik baqylaý komıteti 2012 jylǵy 17 shildede № 55 Qyzylorda-Kókshetaý baǵytyndaǵy («Suńqar-1» JShS) jolaýshylar poıyzyna tekserý júrgizdi. Reıd barysynda poıyzǵa bıletsiz mingen 98 jolaýshy anyqtaldy.
«Bıletsiz mingen jolaýshylardyń 13 kýpe jáne platskart vagondaryna jaıǵastyrylǵanyn jáne poıyzǵa bılet alyp mingen jolaýshylarǵa qolaısyzdyq týdyrǵandaryn aıtyp ótý kerek. Poıyz brıgadasynyń qyzmetkerleri Qazaqstan Respýblıkasynyń Ákimshilik quqyq buzýshylyq kodeksine sáıkes ákimshilik jaýapkershilikke tartyldy», - delingen mınıstrliktiń baspasóz qyzmeti taratqan baspasóz aıǵaǵynda.
Kóliktik baqylaý komıtetiniń qyzmetkerleri jaz mezgilinde temir jol kóliginde jolaýshylardy, júkterdi tasymaldaý erejelerin saqtaý boıynsha 2012 jyldyń ekinshi jartyjyldyǵyna arnalǵan jumys josparyna sáıkes temir jol kóliginde jolaýshy tasymaldaýmen aınalysatyn tasymaldaýshylarǵa tekserý júrgizip otyrady.
Anyqtama: platskart vagonynyń syıymdylyǵy - 51 adam, kýpe vagonynyń syıymdylyǵy - 37 adam. № 55 Qyzylorda-Kókshetaý baǵytyndaǵy jolaýshylar poıyzy barlyǵy 17 vagonnan turady: 9-kýpe, 8 platskart.
