Kólik mingen qostanaılyq balyqshylar eki kún qar qursaýynda jatqan
QOSTANAI. QazAqparat - Arqalyq qalasynda adasyp ketken balyqshylarǵa kómek kórsetildi, dep habarlaıdy QazAqparat.
Oblystyq Tótenshe jaǵdaılar departamentiniń aqparatyna sáıkes, oqıǵa Arqalyq-Qaıyńdy avtojolynyń 65-shi shaqyrymynda bolǵan.
«112» nómirine Qaratorǵaı ózeniniń mańynda ishinde 1986 jáne 1988 jyldary týǵan eki balyqshy bar jeńil avtokólik eki táýlik boıy qar qursaýynda turǵany týraly aqparat tústi. Balyqshylar dittegen jerine jete almaǵan, boran soǵyp, keri qaıta almaı, qalyp qoıǵan. Qutqarýshylardyń kelýimen balyqshylardyń avtokólikterinde birneshe saǵatqa jetetin benzın qalǵandyǵy anyqtaldy. Termometr baǵany -25 gradýstan tómen túsip ketken», - delingen vedomstvonyń baspasóz habarlamasynda.
QR ІІM Tótenshe jaǵdaılar komıtetiniń Arqalyq qalasyndaǵy Soltústik óńirlik aeroutqyr jedel-qutqarý jasaǵynyń qutqarýshylary oqıǵa ornyna ótimdiligi joǵary GT-TB tehnıkasymen jetken. Olar qar qursaýynda qalǵan avtokólikti oqshaý jerge súırep shyǵaryp, Arqalyq qalasyna deıin jetkizip salǵan.
Qutqarýshylar qolaısyz aýa raıy kezderinde úıde qalýdy jáne daýyl jónindegi eskertýlerge jaýaptylyqpen qaraýdy usynady.
