Kólik quralyn basqarýǵa senimhat joıylady
ASTANA. QazAqparat - Kólik quralyn basqarýǵa senimhat joıylady. Bul týraly búgin «Qazaqstan Respýblıkasynyń keıbir zańnamalyq aktilerine kásipkerlik qyzmetti túbegeıli jaqsartý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.
Ulttyq ekonomıka vıtse-mınıstri Qaıyrbek Óskenbaevtyń aıtýynsha, memleket rólin shekteý jáne naryqtyń ózin-ózi retteýin damytý úshin kásipkerlerge qatysty tekserýlerdi uıymdastyrý jáne júrgizý tásilderi qaıta qaralmaq. Bul rette jeke salalarda, atap aıtqanda sanıtarııalyq-epıdemıologııalyq qadaǵalaý, órt qaýipsizdigi, salyqtyq ákimshilendirý salalarynda tekserýlerge balama retinde kameraldyq baqylaý, aýdıt nemese saqtandyrý sharalary engiziledi.
«Jeke kásipkerlik sýbektilerin taratý rásimi aıtarlyqtaı ońaılatylady, sosyn qurylysqa ruqsat alý kezindegi rásimderdiń merzimi jáne sany qysqarady. Budan bólek, jer paıdalaný salasynda jerlerdi nysanaly maqsatta paıdalaný túrleriniń jikteýishi tolyǵymen joıylyp, eldi mekender úshin jer ýchaskeleriniń fýnktsıonaldyq nysanasynyń 3 úlgisi engiziledi, olar: turǵyn úı, áleýmettik jáne kommertsııalyq», - dedi Q. Óskenbaev.
Onyń sózine qaraǵanda, memlekettik organdarmen ózara is-qımyl jasaýda azamattardyń negizsiz shyǵyndaryn joıý maqsatynda qujattar kóshirmelerin mindetti notarıaldy kýálandyrý, kommertsııalyq maqsatta paıdalanylmaıtyn, paıdalaný merzimi 7 jyldan aspaıtyn jeke avtokólikke tehnıkalyq baıqaý, sondaı-aq kólik quralyn basqarýǵa senimhat joıylady.
Tutastaı alǵanda, zań jobasynda qaralǵan is-sharalardy iske asyrý respýblıkada kásipkerliktiń damýyna, kásipkerlik sektordaǵy óndiristiń jıyntyq kóleminiń ósýi esebinen eldiń ulttyq kirisiniń ósýine, tıisinshe jumyssyzdyqtyń qysqarýyna jáne ózge de oń áleýmettik-ekonomıkalyq saldarǵa yqpal etetin bolady.
