Kólik quraldarynyń tehnıkalyq baıqaýyn básekeli ortaǵa berýdi kózdeıtin zań jobasy tanystyryldy
ASTANA. Qazannyń 20-sy. QazAqparat /Rýslan Ǵabbasov/ - Respýblıkada tirkelgen avtókólik quraldarynyń sany 3 mıllıonnan astam.
Bul týraly búgin Astanada «Tehnıkalyq baıqaýdy básekeli ortaǵa berý: jańa kózqaras jáne perspektıvalar» atty dóńgelek ústelde Kólik jáne kommýnıkatsııa mınıstrligi Kóliktik baqylaý komıtetiniń basqarma bastyǵy Dýman Dúısenbaı aıtty.
Jıyn barysynda kólik quraldaryna tehnıkalyq baıqaýdy júrgizýdi básekelestik ortaǵa berýdi qarastyratyn, Іshki ister mınıstrligine tehnıkalyq baıqaýdy ýaqytynda ótýdi baqylaýdy saqtaı otyryp, Kólik jáne kommýnıkatsııa mınıstrligine tehnıkalyq baıqaýdy júrgizýdi baqylaý boıynsha quziretti júkteıtin zań jobasy tanystyryldy.
Atap aıtqanda zań jobasy boıynsha úsh kodekske, sondaı-aq tórt zańǵa ózgertýler engizý qarastyrylǵan.
D. Dúısenbaıdyń sózine qaraǵanda, búginde zań jobasy QR Úkimetiniń qaraýyna engizildi. Zań jobasynda kórsetilgen jańa tártipke sáıkes QR Úkimeti tehnıkalyq baıqaýdy júrgizýdiń tártibin jáne merzimin bekitedi. Al QR Іshki ister mınıstrligi avtokólik quraldaryn jelide baqylaıdy. Sonymen qatar óz kezeginde Kólik jáne kommýnıkatsııa mınıstrligi mindetti tehnıkalyq baıqaýdy júrgizý boıynsha stansylardy uıymdastyrý men baqylaýdy qamtamasyz etýge quziretti bolady. «ıAǵnı, mınıstrlik tehnıkalyq baıqaý ortalyqtarynyń reestrin júrgizedi, munymen qosa tehnıkalyq baıqaýdyń tártibi men sapasyn qadaǵalaıdy»,- dedi basqarma bastyǵy.
Onyń sózine qaraǵanda, zań jobasy boıynsha tehnıkalyq baıqaýdyń jańa tártibin 2011 jyly engizý josparlanyp otyr. Sondaı-aq bul turǵyda zańnyń kúshine enýin 2011 jylǵy shildeniń 1-inen bastaıtyn ótpeli kezeń eskerilmek. «Osy ótpel kezeń qalalar men aýdandarda tıisti tehnıkalyq baıqaý ortalyqtaryn uıymdastyrýǵa, olarǵa tehnıkalyq baıqaý jelilerin qajetti mólsherde alýǵa, mamandardy daıarlaýǵa kerek bolady»,- dedi basqarma bastyǵy.
«Zań kúshine engenshe tehnıkalyq baıqaýmen Jol polıtsııasy organdary aınalysady»,- dep túıindedi ol.
Búginde respýblıkada tirkelgen avtókólik quraldarynyń sany 3 mıllıonnan astam. 2006 jylmen salystyrǵanda bul kórsetkish 83 paıyzǵa artyp otyr.
