Kólik qozǵalysyndaǵy shekteýlerge qaramastan azamattar aınalma joldar arqyly ózderine tótenshe jaǵdaılar jasaıdy - QR TJM
ASTANA. 20 jeltoqsan. QazAqparat - Qabyldanatyn sharalarǵa qaramastan azamattar óz ómiri men jaqyn týǵan-týysqandarynyń ómirine qaýip tóndirip jatady. Bul týraly búgin Astanada ótken brıfıngte QR TJM Tótenshe jaǵdaılardy joıý departamenti apattyq qutqarý qyzmeti kúshteri men quraldary basqarmasynyń sarapshysy Úmit Aldanbergenova aıtty.
«Qys kezinde aýa raıynyń qolaısyzdyǵy kezinde tótenshe jaǵdaılardyń aldyn alý maqsatynda kólik qozǵalysyn shekteý úshin joldardy jabý jáne basqa da tıisti sharalar qabyldanyp jatady. Alaıda, qabyldanatyn sharalarǵa qaramastan azamattar óz ómiri men jaqyn týǵan-týysqandarynyń ómirine qaýip tóndirtip, kólik qozǵalysy úshin aınalma joldardy taýyp alyp, ózderine tótenshe jaǵdaılar jasaıdy»,-dedi sarapshy.
Osy oraıda ol eger azamattar qaýipsizdiktiń qarapaıym sharalaryn eleıtin bolsa, kóptegen tótenshe jaǵdaılardan qutylýǵa bolatynyn atap ótti.
Úmit Aldanbergenovanyń sózine qaraǵanda, tótenshe jaǵdaılardy boldyrmaý maqsatynda aýa raıynyń ózgerýin habarlaǵan memlekettik organdardyń habarlamalaryna jaýapkershilikpen qaraý qajet. Sonymen qatar kólik júrgizýshileri joldardy qar basqan nemese kóktaıǵaq kezderinde jolǵa shyqpaǵany jón.
Belgili bolǵandaı, bıylǵy qysta kóktaıǵaq, boran jáne tómen temperatýranyń saldarynan respýblıkalyq joldardy jabý týraly sharalar 104 ret qabyldandy. Osy jylǵy qystyń 20 kúninde QR TJM qutqarýshylary qar qursaýynan 943 adamdy qutqaryp, 146 avtokólikti evakýatsııalady.
