Kólik qozǵaltqyshyna qasaqana qum quıyp ketken qyzylordalyq ustaldy
QYZYLORDA. QazAqparat - Qyzylorda oblysynda avtokólik qozǵaltqyshyna qasaqana qum quıyp ketken adam ustaldy, dep habarlaıdy QazAqparat tilshisi.
Qyzylorda qalasyndaǵy tehnıkalyq jóndeý ortalyǵynda jóndeýden ótip jatqan «Hyundai Accent» markaly avtokólik qozǵaltqyshyna belgisiz bireý ádeıi qum quıyp, ony zaqymdaǵan. Materıaldyq shyǵyn shamamen 1 mıllıon teńgeni qurady.
Polıtsııa qyzmetkerleriniń jedel-izdestirý sharalarynyń nátıjesinde kúdikti ustaldy. Ol 1992 jyly dúnıege kelgen qala turǵyny bolyp shyqty.
«Kúdiktige qatysty eshqaıda ketpeý jáne tıisti minez-qulyq týraly qolhat túrinde bultartpaý sharasy qoldanyldy. Qazirgi tańda bul boıynsha QR Qylmystyq kodeksiniń 202-babynyń 1-bóligimen sotqa deıingi tergep-tekserý amaldary júrgizilýde. Onda aıtarlyqtaı zalal keltirip, bótenniń múlkin qasaqana joıý nemese búldirý jaǵdaıy kórsetilgen», - dedi Qyzylorda oblystyq polıtsııa departamentiniń baspasóz qyzmeti.
