Kólik komıteti «Semey Bus» JShS máselesi týraly pikir bildirdi
NUR-SULTAN. QazAqparat – QR Indýstrııa jáne ınfraqurylymdyq damý mınıstrligi Kólik komıteti tóraǵasynyń orynbasary Álı Altaı «Semey Bus» JShS sýbsıdııa tólenbeýi týraly máselege pikir bildirdi, dep habarlaıdy QazAqparat.
«Semey Bus» JShS kvazımemlekettik kásiporyn bolyp sanalady, oǵan 2019 jyldan beri sýbsıdııa tólenbegen. Semeıdegi avtobýs tasymaly jaǵdaıyna nazar aýdarýyńyzdy suraımyn. Ákimdik sýbsıdııa tólemeıdi, kásiporyndy bankrotqa ushyratýy múmkin», - dep moderator kórermen suraǵyn oqydy.
Kólik komıteti tóraǵasynyń orynbasary Álı Altaı bul máseleden habardar ekenin jetkizdi.
«Eki jyl boıy olar Ónerkásipti damytý qory arqyly avtobýstar satyp aldy. Qazir olar bir de bir teńgeni ótemedi. Ónerkásipti damytý qory óz tarapynan protsedýralyq túrde sotqa júginýge jáne buryn jasasqan sharttardy toqtata turýǵa mindetti. Ákimdik tarapynan osy jylǵa sýbsıdııalar qarastyrylǵan, biraq kásipkerdiń ákimdikke engizgen ótinimderi óte úlken boldy. Ákimdikpen esh ýaǵdalastyq joq. Máseleni baqylaýda ustap otyrmyz», - dedi Álı Altaı «Kazinform» alańynda «Qoǵamdyq kólikpen jolaýshylar tasymaldaýdaǵy básekelestik» atty jıynda.
Buǵan deıin Shyǵys Qazaqstan oblysynda jolaýshy tasymaldaıtyn kompanııa - «Semey Bus» JShS-ǵa jospardan tys tekseris júrgizilip, 72 zańbuzýshylyq anyqtalǵany habarlanǵan edi. «Semey Bus» JShS-niń jumysshylar aldyndaǵy jalpy qaryzy 6 274 139 teńgeni quraıdy.
Teriske shyǵarý
«Semey Vus» JShS men «Ónerkásipti damytý qory» AQ arasynda sharttyq mindettemelerdi oryndaý týraly málimettiń tolyqsyzdyǵy sebebimen kórsetilgen kólik kásiporynmen baılanysty aǵymdaǵy ahýal týraly jaýapty tujyrymdaýdyń dál emestigi oryn aldy. Osyǵan baılanysty «Buqaralyq aqparat quraldary týraly» Qazaqstan Respýblıkasynyń Zańy 19-babyna sáıkes meniń «OPEN SPACE - Qoǵamdyq kólikpen jolaýshylar tasymalyndaǵy básekelestik» onlaın brıfınginde aıtylǵan aqparatty teriske shyǵaramyn. Bizge bul jaǵdaı belgili. Osy jaǵdaı azamattyq zańnamaǵa sáıkes rettelýi tıis dep sanaımyz. Jalpy alǵanda turaqty qalalyq avtobýs tasymaly jergilikti atqarýshy organdarymen uıymdastyrylady. Sol sebepti Semeı qalasynyń ákimdigi jergilikti halyqty qaýipsiz jáne sapaly qoǵamdyq kólikpen qamtamasyz etý boıynsha qajetti sharalar qabyldaýy tıis. Osy másele baqylaýda» - dep túsindirdi Áli Altaı.
____________________________________
16.07.2021