Kólik komıteti «Aıqyn baǵyt» jobalyq keńsesin tanystyrdy
Atap aıtqanda, jobalyq keńse arqyly kóliktik baqylaý qyzmetkeriniń qatysýynsyz avtokólikterdiń salmaqtyq jáne gabarıttik parametrlerin avtomatty túrde anyqtaıtyn ólsheý stantsııalary paıdalanýǵa berilgeli otyr. Tasymaldaýshylardyń avtomattandyrylǵan ólsheý stantsııalarynda AKQ ólsheý quralynyń salmaqtyq, gabarıttik parametrlerinen asyra júrip ótkendigi anyqtalǵan jaǵdaıda qaıta anyqtaýǵa múmkindigi bar. Bul rette, tasymaldaýshylardy jolda toqtatpaı júk tasymaldaý merzimin qysqartýǵa jáne sybaılas jemqorlyq táýekelderiniń aldyn alýǵa bolady.
«Biz osy jyldyń maýsym aıynda QR Indýstrııa jáne ınfraqurylymdyq damý mınıstrligi kólik komıtetiniń «Aıqyn baǵyt» atty jobalyq keńsesin qurdyq. Mundaǵy maqsat – bizdiń komıtettiń jumysyn jetildirý, damytý. Bul rette negizgi mindetterdi tańdap aldyq, ıaǵnı qazirgi tańda jańa jobalardy irikteý, basqarý júıesin jetildirý jumystaryn júrgizýdemiz. Jobalyq keńse arqyly aqparattyq júıelerdi engizip, kóliktik baqylaý qyzmetterin jetildirý, ólsheýdiń avtomatty júıesin engizýdi kózdeımiz», - dedi jobalyq keńseniń tanystyrylymynda QR IIDM kólik komıteti tóraǵasynyń orynbasary Danııar Qospabaev.
Budan basqa, komıtet qyzmetiniń tıimdiligin arttyrý úshin fýnktsıonaldyq taldaý júrgizý jáne bıznes-úderisterdi ońtaılandyrý jolymen ISO 9001 standartyna qol jetkizý jobasy ázirlengen. Qazirgi ýaqytta fýnktsıonaldyq taldaý júrgizý nátıjesinde mınıstrliktiń, komıtettiń jáne qurylymdyq basqarmalardyń erejelerine tıisti ózgerister engizilýde.
Sonymen qatar, árbir mamannyń laýazymdyq nusqaýlyqtarynda júktelgen mindetter naqty kórsetiledi. Budan bólek, komıtette derekterdiń úlken kólemin sanaýly merzimde óńdeýge múmkindik beretin BI-júıelerdi engizý jónindegi joba iske asyrylyp jatyr.