Kólik kartasynda qansha aqsha qalǵanyn endi «Astana LRT» saıtynan bilýge bolady
ASTANA. QazAqparat - «Astana LRT» kompanııasynda jolaýshylardyń kólik kartasynan aqshanyń eki ese alynyp tastalatyna qatysty shaǵymǵa jaýap berildi, dep habarlaıdy QazAqparat tilshisi.
«Adamdardyń shaǵymy dálelsiz bolmaýy úshin men árdaıym mundaı jaǵdaıda kartanyń nómirin joldaýdy suraımyn. Turǵyndar tekserip berýdi suraǵan kólik kartalarynyń barlyǵyn tolyǵymen taldap tekserip, qosymsha aqsha alyný jaǵdaıyn kezdestirgen joqpyz. Qalalyq tarıf - 90 teńge, ekspress - 180 teńge. Qateniń keselinen aqshanyń alyný jaǵdaıy tirkelgen joq», - deıdi kompanııanyń baspasóz hatshysy Naýat Azanbaeva redaktsııanyń resmı saýalyna.
Onyń aıtýynsha, mundaı jaǵdaıda jolaýshylardy da aıyptaý orynsyz.
«Jolaýshylardy da túsinýge bolady - sebebi qaıda barǵanyn barlyq adamdar esine saqtamaýy da yqtımal. Ózim de qoǵamdyq kólikte júretindikten, mundaı jaǵdaılardy túsinemin», - deıdi Naýat Azanbaeva.
Sonymen qatar, «Astana LRT» ókili osy jyldyń qyrkúıeginde bastalǵaly otyrǵan tólem júrgizýdiń jańa múmkindikteri men kólik kartasyndaǵy aqshany baqylaý júıesi týraly aıtyp berdi.
«Tolyq detalızatsııany saıtqa kirip, ol jerge ótinim qaldyrý arqyly alýǵa bolady. Qyrkúıek aıynan bastap tyń qyzmet jumysyn bastaıdy - jolaýshy kólik kartasyndaǵy aqshanyń qansha qalǵanyn baqylaı alady. Sonymen birge, 1 qyrkúıekten bastap SMS arqyly tólem júrgizý ádisi iske qosylmaq. «Beeline» kompanııasy 1 sms - 1 teńge aktsııasyn júrgizetien bolady», - deıdi ol.
Eske sala ketsek, buǵan deıin astanalyqtar Astra plat kartasynan aqshany eki ese alynyp jatqanyn aıtyp shaǵymdanǵan bolatyn. Qala turǵyndary ózderiniń shaǵymdaryn áleýmettik jelige qaldyrǵan.
