Kólik qarqyny joǵary tasjoldarǵa proektsııalyq jolaqtar ornatyldy
ASTANA. QazAqparat - Respýblıkalyq mańyzy bar tasjoldarda jol qozǵalysy qaýipsizdigin arttyrý úshin QazAvtoJol mamandary jaıaý júrginshilerge arnalǵan proektsııalyq ótkelderdi ornatyp jatyr. Máselen, zamanaýı tehnologııa Almaty óńirinde ornalasqan respýblıkalyq mańyzdaǵy tasjoldarda paıda boldy, dep habarlaıdy QazAqparat.
Bes jańa proektsııalyq jaıaý júrginshiler ótkelderi eldi mekenderdiń, oqý oryndarynyń jáne medıtsınalyq kómek kórsetý pýnkteriniń qasyna ornatyldy.
A-2 «ÓR shekarasy (Tashkentke) - Shymkent - Taraz - Almaty - Qorǵas» tasjolynyń 29 shaqyrymynda (Qarasaı aýdany, Barys avtobazarynyń janynda);
A-4 «Almaty - Shamalǵan - Uzynaǵash - Aqqaınar - Suranshy batyr - QR shekarasy» tasjolynyń 52 shaqyrymynda (Jambyl aýdany, Qarǵaly kentiniń janynda);
M-36 «RF shekarasy (Ekaterınbýrgke) - Almaty» avtojolynyń 40 shaqyrymynda (Qarasaı aýdany, Qoshmambet kentiniń janynda);
A-2 «ÓR shekarasy (Tashkentke) - Shymkent - Taraz - Almaty - Qorǵas» tasjolynyń 24 shaqyrymynda (Talǵar aýdany, Panfılov kentiniń mańynda);
R-17 «Almaty - Talǵar - Báıdibek bı«tasjolynyń 15 shaqyrymynda (Talǵar aýdany, Belbulaq kentiniń janynda) ornatyldy.
Arnaıy gobo-proektorlardyń kómegimen aýa raıynyń kez kelgen túrinde avtokólik júrgizýshileri men jaıaý júrginshiler jolda aq-sary jaıaý júrginshiler zebrasyn anyq kóre alady. Proektsııa júrgizýshilerge joldan ótip bara jatqan adamdardy 100-150 metr qashyqtyqta ýaqtyly baıqaýǵa múmkindik beredi.
Dál osyndaı 30-ǵa jýyq proektsııalyq jolaq buǵan deıin elimizdiń toǵyz óńiriniń respýblıkalyq mańyzdaǵy tasjoldaryna ornatyldy.
