Kólik qaqqan úsh balanyń biri mert boldy: Túrkistanda júrgizýshi izdestirilýde
TÚRKІSTAN. QazAqparat – Túrkistan oblysynda úsh balany kóligimen qaǵyp, oqıǵa ornynan iz sýytqan kúdikti izdestirilýde. Balalardyń biri aýrýhanada kóz jumdy, dep habarlaıdy QazAqparat.
«14 aqpanda Jetisaı aýdandyq polıtsııa bólimine túrli dene jaraqattarymen kámelet jasyna tolmaǵan 3 balanyń jetkizilgeni týraly aýrýhanadan habarlama kelip tústi. Atalǵan jaıt boıynsha polıtseıler birden tekserý jumystaryn júrgizdi. Oqıǵa ornyna jedel jetken polıtseıler sol kúni keshki saǵat 17:50 shamasynda Jetisaı aýdanyndaǵy S.Erýbaev kóshesi boıynda belgisiz avtokólik ońtústikten soltústik baǵytyna qaraı júrip bara jatyp, 3 jasóspirim balany soǵyp, jol-kólik oqıǵasyn jasaǵanyn anyqtady.
Saldarynan úsh bala da aýrýhanaǵa jetkizildi. ıAǵnı 16 jáne 13 jas shamasyndaǵy balalar túrli dene jaraqattarymen em qabyldaýda. Al 4 jastaǵy búldirshin aýyr dene jaraqatynan jansaqtaý bólimine túsip, kóz jumdy», - dedi Polıtsııa departamentinen.
Atalǵan fakti Jetisaı aýdandyq polıtsııa bóliminde QR QK-niń 345-baby (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) jáne QR QK-niń 347-baby (Jol-kólik oqıǵasy bolǵan jerden ketip qalý) boıynsha sotqa deıingi tergep-tekserýdiń biryńǵaı tizilimine tirkeldi.
«Aýdan polıtseıleri kúdiktini anyqtaýǵa qatysty jedel izdestirý jumystaryn júrgizýde. Oqıǵa ornyn tııanaqty teksergen tártip saqshylary belgisiz avtokóliktiń artqy jaryq shamdarynyń synyqtary men aına synyqtaryn tapty. Olardyń «Aýdı-100» markaly avtokóligine tıesili jáne kóliktiń túsi sur-qara bolýy yqtımal ekenin boljaýda.
Sondyqtan osy boljamǵa sáıkes Jetisaı aýdanyndaǵy «Aýdı-100» markaly avtokólikter tyńǵylyqty tekserilýde», - dep naqtylady vedomstvodan.
Atalǵan oqıǵa boıynsha qandaı da bir málimetke ıe azamattar 102 nómirine, ne bolmasa Jetisaı APB-nyń kezekshi bólimine: 87253467020, senim telefonyna: 6-70-07 habarlasa alady.
