Kólik qaqqan almatylyq boıjetken jansaqtaý bóliminde jatyr
ALMATY. QazAqparat - Almatyda jaıaý júrginshi jolaǵynan ótip bara jatqan 24 jastaǵy boıjetkendi kólik qaǵyp ketti.
Qaıǵyly oqıǵa Naýryzbaı batyr men Tımırıazev kósheleriniń qıylysynda keshki 20.30 shamasynda boldy.
Bolǵan jáıtke baılanysty qalalyq ІІD-niń resmı ókili Saltanat Ázirbek túsinik berdi.
«Qazir ІІD-niń anyqtaý basqarmasynda QR QK 345-babynyń 2-bólimi boıynsha sotqa deıingi tergeý júrip jatyr. Júrgizýshi Tımırıazev kóshesimen shyǵysqa baǵyttalyp kele jatqan. Jaıaý júrginshi jolaǵynda qyzdy baıqamaı, ony qaǵyp ketedi. Qazir óziniń kinásin moıyndap otyr», - dedi S.Ázirbek.
Qazir Názıgúl Arstambekova Jedel járdem stansasy aýrýhanasynda jansaqtaý bóliminde jatyr.
Buǵan deıin boıjetkenniń ápkeleri áleýmettik jelide oqıǵaǵa kýá bolǵan adamdardyń habarlasýyn ótingen edi.
«Sińlim morfııdiń arqasynda jasandy ókpe ventılıatsııasynda jatyr. Dárigerler kók baýyryn alyp tastady, 6 qabyrǵasy syndy, búıregi qantalap tur, bas-mı jaraqatyn alǵan, bet terisiniń jartysy joq. Jantúrshigerlik jaǵdaıda jatyr», - dep jazdy qyzdyń ápkesi Aıgúl Arstambekova Instagramdaǵy paraqshada.
