Kólik qaǵyp ketken eki polıtseı aýrýhanaǵa tústi, bireýi aýyr halde - Jambyl oblysy
JAMBYL OBLYSY. QazAqparat – Jambyl oblysynda jol jıeginde turǵan eki polıtseıdi avtokólik qaǵyp ketken. Olar aýrýhanaǵa jatqyzyldy, dep habarlaıdy QazAqparat oblystyq polıtsııa departamentiniń baspasóz qyzmeti silteme jasap.
«Aǵymdaǵy jyldyń 25 jeltoqsanynda Jambyl oblysynyń Polıtsııa departamenti patrýldik polıtsııa batalonynyń qyzmetkerleri «Batys Eýropa – Batys Qytaı» tas jolynyń 205-shaqyrymynda Qordaı aýdanynyń Soǵandy aýyly mańynda jol shetindegi jyraǵa aýdarylyp ketken «Honda» markaly kóligin kórgen. Atalǵan jol-kólik oqıǵasyn resimdeý barysynda jol jıeginde turǵan polıtsııa qyzmetkerlerin Tarazdan Almatyǵa qaraı bara jatqan «Aýdı A6» markaly avtokóligi qaǵyp ketken. 33 jastaǵy kólik júrgizýshisi rýlge ıe bola almaǵan»,-delingen vedomstvonyń habarlamasynda.
Jol-kólik oqıǵasynan kezinde atalǵan polıtsııa departamenti PPB-nyń eki ınspektory zardap shekken. Ekeýi de Qordaı aýdanynyń ortalyq aýrýhanasyna jatqyzylǵan.
Búginde polıtsııa aǵa leıtenanty Serik Ibraımov aýyr jaǵdaıda, polıtsııa aǵa leıtenanty Baqytjan Naýryzbaev túrli dene jaraqattaryn alǵan. Qazirgi tańda oqıǵaǵa qatysty Jambyl oblysy Polıtsııa departamentiniń jedel-tergeý toby jumys jasaýda.
«Qurmetti kólik júrgizýshileri! Oqys oqıǵalardy jáne osyǵan uqsas aýyr saldary bar jol-kólik oqıǵalaryn boldyrmaý úshin asa uqypty jáne saq bolyńyzdar, sondaı-aq jol qozǵalysy erejelerin qatań saqtaý qajettigin taǵy da esterińizge salamyz! Ózińizdiń de, ózgeniń de ómirine qaýip tóndirmeńizder», -deıdi PD baspasóz qyzmeti.
Sondaı-aq, mamandar qazirgi tańda oblys aýmaǵynda aýa-raıynyń qolaısyzdyǵyn, kólik joldaryndaǵy kóktaıǵaq jol qozǵalysyna qatysýshylarǵa qaýip tóndiretindigin eskertedi.
