Kólik ıesi joldy kútip ustamaǵan «QazAvtoJoldan» 8 mln óndirip aldy
Nur-Sultan qalalyq soty taratqan aqparatqa sáıkes, 2018 jyldyń qańtar aıynda «Nur-Sultan-Petropavl» baǵytyndaǵy joldyń 82 shaqyrymynda «Skoda Rapid» pen «Skoda SuperB» markaly avtokólikter soqtyǵysqan. Saldarynan «Skoda Rapid»-tiń jolaýshylary Aqmola oblysynyń Shortandy jáne Aqkól aýdandarynyń ortalyq aýdandyq aýrýhanalaryna ártúrli dene jaraqatymen jetkizilgen. Keıinnen bir jolaýshy kóz jumdy.
Aqmola oblystyq Polıtsııa departamenti QR QK-niń 345-baby 3-bóligi (jolaýshy ólimine alyp kelgen jol apaty) boıynsha qylmystyq is qozǵap, sotqa deıingi tergeýdi bastady. Biraq «Skoda Rapid» júrgizýshisiniń isinde qylmys quramynyń bolmaýyna baılanysty sotaldy tergeý toqtatyldy. Kólik ıesi jolaýshylarǵa, onyń ishinde qaza tapqan jolaýshynyń jubaıyna materıaldyq shyǵyn men moraldyq zııandy tolyǵymen ótep bergen.
«Skoda Rapid» markaly kóliktiń naryqtaǵy baǵasy 2 894 000 teńge dep baǵalanǵan. Kólik qaıta qalpyna keltirýge jatpaıdy. Osydan keıin kólik ıesi Esil aýdandyq sotyna «QazAvtoJol» Ulttyq kompanııasy» AQ-dan 8 194 000 teńge kóleminde shyǵyndy óndirip berý týraly aryzben júgindi. Bul somaǵa jolaýshylar men kóz jumǵan jolaýshynyń jubaıyna tólengen aqsha jáne qalpyna keltirýge jatpaıtyn kóliktiń quny engizilgen», - delingen elorda soty taratqan aqparatta.
Nátıjesinde sot «QazAvtoJol» ulttyq kompanııasy kólik apaty bolǵan kúni joldy qardan arshý boıynsha da, kóktaıǵaqqa qarsy da eshqandaı shara qabyldamaǵanyn anyqtaǵan.
«Sondaı-aq atalmysh jol ýchaskesinde qozǵalysty jabý nemese jyldamdyqty shekteý boıynsha da eshbir shara qoldanylmaǵan. Sot sheshimimen «QazAvtoJol» ulttyq kompanııasy» aktsıonerlik qoǵamynan «Skoda Rapid» ıesiniń paıdasyna kórsetilgen shyǵyn somasy óndirildi. Sheshim zańdy kúshine endi», - delingen resmı aqparatta.
