Kólik Ertiske qulaı jazdady: Semeıde demalýshylar qaıǵyly jaǵdaıdan aman qaldy
Abaı oblystyq Polıtsııa departamenti baspasóz qyzmetiniń málimetine súıensek, jol-kólik oqıǵasy qaladaǵy Beıbitshilik jaǵalaýynyń mańynda bolǵan.
«Toyota Prado» kóligin mas kúıde tizgindep kele jatqan 56 jastaǵy júrgizýshi jyldamdyqty ruqsat etilgen shekten asyryp jibergen. Sonyń saldarynan jolda toqtap turǵan «Hyundai Accent» kóligimen soqtyǵysty.
Soqqydan jeńil kólik jaǵalaýǵa qaraı ushyp túsip, demalyp júrgen turǵyndardy basyp qala jazdaǵan. Abyroı bolǵanda, eshkim zardap shekpedi.
«Toyota Prado» kóliginiń júrgizýshisine qatysty QR Ákimshilik quqyqbuzýshylyq týraly kodekstiń 608-baby 3-bóligimen (mas kúıdegi júrgizýshiniń rýlge otyryp, kólik quralynyń búlinýine ákep soqqan jol apatyna sebepker bolýy) ákimshilik hattama toltyryldy. Bul buzýshylyq jıyrma táýlikke ákimshilik qamaýǵa alýǵa jáne jeti jyl merzimge kólik quralyn basqarý quqyǵynan aıyrýǵa ákep soǵady», - delingen aqparatta.
