Kólik baqylaý ınspektsııalary qyzmetkerleriniń sany kóbeımeıdi - Jeńis Qasymbek
NUR-SULTAN. QazAqparat - Qazaqstanda kólik baqylaý ınspektsııalary qyzmetkerleriniń shtat sany kóbeıtilmeıdi. Bul jaıynda Májilis depýttarynyń resmı saýalyna QR Premer-Mınıstriniń orynbasary Jeńis Qasymbektiń jaýabynda aıtylǵan, dep habarlaıdy QazAqparat tilshisi.
«Avtomobıl kóligi týraly» qoldanystaǵy Zańnyń oryndalýyn qatań qadaǵalap, avtojoldardy aýyr salmaqty kólikterdiń búldirýine jol bermeýge tıisti óńirlik kólik baqylaý ınspektsııalary ózderine júktelgen mindetti tolyq atqaryp otyr deý qıyn ekendigi aıtylǵan. Sebebi olardyń qyzmetkerleriniń sany az jáne materıaldyq-tehnıkalyq jabdyqtalýy jetkiliksiz. Mysal úshin, eginshilikpen aınalysatyn Soltústik Qazaqstan oblysynyń kólik baqylaý ınspektsııasyndaǵy 6 qyzmetker 13 aýyldyq aýdannyń joldaryndaǵy kólik aǵynyn qadaǵalap úlgere alar emes. Munda jalǵyz-aq jyljymaly kóliktik baqylaý beketi bar. Al ulan-ǵaıyr egin alqabyna ıe Qostanaı oblysynda nebári 2 jyljymaly beket jumys isteıdi. Astyqty Aqmola oblysynda da olardyń sany - 4-eý ǵana», - delingen depýtattardyń resmı saýalynda.
Sonymen qatar Májilis depýtattary elimizdiń negizgi astyqty óńirleriniń erekshelikterin eskere otyryp, olardyń kólik baqylaý ınspektsııalary qyzmetkerleriniń jáne jyljymaly kólik baqylaý beketteriniń sanyn kóbeıtý máselesin qarastyrýdy usynǵan bolatyn.
Resmı saýalǵa jaýap bergen Jeńis Qasymbektiń atap ótýinshe, Qazaqstan Respýblıkasynyń avtomobıl kóligi týraly zańnamasynyń saqtalýyn memlekettik baqylaýdy 48 jyljymaly, 3 statsıonarlyq kóliktik baqylaý beketi jáne arnaıy avtomattandyrylǵan ólsheý quraly (budan ári - AAÓQ) júzege asyrady.
«Búgingi kúngi Qazaqstan Respýblıkasynda kólik quraldary men onyń salmaq gabarıtti ólshemderi týraly aqparatty avtomattyq túrde jiberetin 12 AAÓQ bar. Tek 2018 jyly AAÓQ kólik zańnamasynyń 804 buzýshylyǵyn anyqtaǵan, aýyr salmaqty jáne (nemese) iri gabarıtti kólik quraldarymen júrip ótken úshin 91 mln 937 myń teńgeden astam aıyppul men alym somasy óndirildi, Jyljymaly kóliktik baqylaý beketterinde ( budan ári - JKBB) 24 242 buzýshylyq anyqtalyp, 5 mlrd. 951 mln teńgeden astam aıyppul men alym somasy óndirildi. Budan basqa, 2018 jyly kólik salasyndaǵy ýákiletti organ 8 JKBB, Pavlodar oblysynyń ákimdigi 3 JKBB satyp aldy jáne kóliktik baqylaý ınspektsııasynyń teńgerimine berildi», - dep atap ótedi vıtse-premer.
Sonymen birge ol kóliktik baqylaý salasyndaǵy sybaılas jemqorlyqtyń oryn alǵandyǵyn eskere otyryp, QR Indýstrııa jáne ınfraqurylymdyq damý mınıstrligi jáne QR Memlekettik qyzmet isteri jáne sybaılas jemqorlyqqa qarsy is-qımyl agenttigi arasynda kóliktik baqylaý salasyndaǵy sybaılas jemqorlyq táýekelderin joıý jóninde birlesken is-sharalar jospary qabyldanǵanyn eske salady.
«Qoldanystaǵy jospardyń sheńberinde avtokólik quraldaryn salmaq gabarıtti ólsheýdiń avtomattandyrylǵan stantsııalaryn qurý arqyly kóliktik baqylaýdy qashyqtyqtan júzege asyrý nysanyna tolyq kóshirý sharalary pysyqtalýda, bul baqylaý-qadaǵalaý fýnktsııalaryn júzege asyrý kezinde laýazymdy adamdardyń qatysýyn boldyrmaıdy. Osyǵan baılanysty, aldaǵy ýaqytta JKBB-niń jáne laýazymdy adamdardyń sanyn kóbeıtý kózdelmegen»,- dedi Jeńis Qasymbek.
