Kólik aıdaýdy úıretetin mektepterge qoıylatyn talap kúsheıtilýi múmkin

NUR-SULTAN. QazAqparat – QR Premer-Mınıstri Álıhan Smaıylov kólik júrgizý mektepteriniń qyzmetine talaptardy kúsheıtý týraly depýtattyq saýalǵa jaýap berdi, dep habarlaıdy QazAqparat tilshisi.

«2018 jyly júrgizýshilerdi daıarlaıtyn oqý uıymdary qyzmetin baqylaý fýnktsııalaryn QR Іshki ister mınıstrliginiń quzyretinen alyp tastaǵan sátten bastap kórsetilgen mindetterdi «Jol júrý týraly» zańnyń 80-baby boıynsha árbir óńirdegi kásiptik birlestikter oryndaıdy («Qazaqstan júrgizýshileri odaǵy», «Kólik jáne jol qyzmetkerleriniń kásipodaǵy» jáne basqalar)» dep jazady Á .Smaıylov óz jaýabynda.

Onyń aıtýynsha, atalǵan birlestikter jumys tájirıbesin taratýǵa jáne kólik júrgizýshilerin daıarlaý standarty boıynsha usynystar berýge, oqý uıymdarynyń quqyqtary men zańdy múddelerin qorǵaýǵa, olardyń reıtıngin ótkizýge, oqytýshylardyń biliktiligin arttyrý kýrstaryn uıymdastyrýǵa, tıisti sertıfıkat berýge jáne basqa sharalarǵa quqyly.

«Ulttyq ekonomıka mınıstrliginiń málimetinshe, kólik júrgizý mektepteriniń qyzmetin lıtsenzııalaýdy engizý Qazaqstannyń 2025 jylǵa deıingi ulttyq damý josparynda aıtylǵan ákimshilik kedergilerdi qysqartý jáne bıznes qurý rásimin ońaılatý jónindegi basymdyqtarǵa sáıkes kelmeıdi. Óz kezeginde QR Іshki ister mınıstrligi bıznesti baqylaýdy qatańdatýǵa salynǵan moratorıı aıaqtalǵannan keıin kólik júrgizý mektepteriniń qyzmetin habarlamalyqtan ruqsat berý tártibine aýystyrý máselesin qarastyrýǵa bolady dep otyr», - dep túıindedi Premer-Mınıstr.