Kólik aıdaý úshin 083-anyqtama talap etilmeýi múmkin

NUR-SULTAN. QazAqparat – QR Densaýlyq saqtaý mınıstri Eljan Birtanov medıtsınalyq anyqtama saýdasymen qalaı kúresip jatqanyn aıtty, dep habarlaıdy QazAqparat tilshisi.

Mınıstr Eljan Birtanov kelesi jyldan bastap medıtsınalyq anyqtamalar tek elektrondy formatta ǵana beriletinin aıtady.

«Medıtsınalyq anyqtamalar memlekettik emhanalarda ǵana emes, jekemenshik medıtsına mekemelerinde de satylyp jatyr. Keı qyzmetkerler jumysyn paıdalanyp, osyndaı paıdakúnemdikke baryp júr. Bul másele boıynsha QR Sybaılas jemqorlyqqa qarsy is-qımyl agenttigimen birge jumys jasap jatyrmyz. Ózge de mınıstrliktermen kelise otyryp, 2019 jyldyń sońyna deıin medıtsınalyq anyqtamalar tek qana elektrondy túrde beriledi degen sheshim qabyldadyq», - deıdi veomstvo basshysy.

Onyń aıtýynsha, anyqtama saýdasyn tyıyp, halyqty qaǵazbastylyqtan qutqarý úshin keıbir medıtsınalyq anyqtamalardyń kúshi joıylmaq.

«Keı jaǵdaılarda medıtsınalyq anyqtama qajet emes degen sheshim shyǵardyq. Mysaly, medıtsınalyq ýnıversıtetke túsý úshin 086-anyqtamasy talap etilmeıtin bolady. Kólik júrgizý quqyǵyn alý úshin talap etiletin 083-anyqtama da kúshin joıýy múmkin. Іshki ister mınıstrligimen jumys istep jatyrmyz. Olar aqparattyq júıege tikeleı qosylý arqyly ár azamattyń densaýlyq deńgeıi týraly biletin bolady. Sonda bul anyqtamanyń da qajeti bolmaı qalady», - dedi Eljan Birtanov.