Kólik aýdarý ýaqytynan rekord qoıǵan áıel Youtube-tiń juldyzyna aınaldy
ASTANA. 12 tamyz. QazAqparat - Ońtústik Korıaenyń turǵyny kólikti júrgizý boıynsha emtıhan tapsyrý barysynda jańa álemdik rekord ornatty! Az ǵana ýaqyt ishinde ol avtodromǵa shyǵar-shyqpastan jeńil kólikti aýdaryp úlgerdi.
Áıel kólik basqyshyna aıaǵyn qoıǵany sol-aq edi, nusqaýshynyń aıǵaıyn estidi. Er adam tejegishti basýdy suraǵan, biraq áıel barlyǵyn kerisinshe jasady, dep habarlaıdy NUR.KZ.
Avtokólik jol jıegine shyǵyp ketip, aýdaryldy. Myna beınekadrlardy oqý-jattyǵý kóliginiń beıneregıstratory túsirip alǵan.
Beınerolık ǵalamtorǵa ornalastyrylǵan ýaqyttan bastap ony eki mıllıonnan astam adam tamashalap úlgeripti.
Aıta ketsek, bul elde avtokólik júrgizýshisi qujatyn alý úshin san márte emtıhan tapsyrýǵa bolady.
Máselen, osydan úsh jyl buryn osy eldiń basqa azamatshasy emtıhandy 950 ret tapsyryp, avtojúrgizýshi atanǵan bolatyn.
