Kólik apatynan qaza bolǵan balalardyń sany birden 38% ósti

ASTANA. QazAqparat – Jol-kólik oqıǵasynda qaza bolǵan balalardyń sany 38%-ǵa ósti. Mundaı derekti Іshki ister mınıstrliginde ótken brıfıngide ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova keltirdi, dep habarlaıdy QazAqparat tilshisi.

«Balalardyń qaýipsizdigi árdaıym ishki ister organdarynyń baqylaýynda bolady, degenmen oqý jylynyń bastalýymen oǵan erekshe nazar aýdarylady. Jyl saıyn jurtshylyqpen júrgiziletin túsindirme jumystaryna qaramastan, biz balalarǵa qaýip tóndiretin eski problemalarmen betpe-bet kelip otyramyz. Bul - jol-kólik oqıǵalary. Aıta ketý kerek, kámeletke tolmaǵandardyń qatysýymen bolǵan jol-kólik oqıǵalarynyń sany - 9%, zardap shekken balalardyń sany 15% tómendegen. Biraq jol-kólik oqıǵasynda qaza bolǵan balalardyń sany 38% ósti», - dep málimdedi Aqtoty Boranova.

Spıker keltirgen derekke saı, zardap shekken balalardyń jartysynan kóbi jolaýshylar, qalǵany jaıaý júrginshiler.