Kólik apatynan eki aıaǵynan aıyrylǵan almatylyq protez kııýge daıyndalýda
ALMATY. QazAqparat - Kólik apatynda eki aıaǵynan aıyrylǵan almatylyq Ekaterına Parafıeva belgili erikti, jattyqtyrýshy Kıra Ýdartsevanyń kómegimen ońaltý sharalarynan ótip jatyr, dep habarlaıdy QazAqparat tilshisi.
Bul týraly Kıra Ýdartseva óziniń Facebook-tegi paraqshasynda jazdy.
«Katıany alǵash kórgenimde.... ol óte názik, jany jaraly edi. Tanysyp, shúıirkelesip kettik. Sodan beri onyń ádemi, jas, aqyldy adam ekenin túsindim. Ol álsizdigine qaramaı barlyǵyn jeńip shyǵatyn bolady», - dedi K. Ýdartseva.
Onyń aıtýynsha, alǵashqy sabaqtar ońaı bolmady. Basynda erikti jattyqtyrýshy aǵzaǵa kóp kúsh túsirmeý úshin az-azdan jattyǵý bastaǵan.
«Pnevmotorakstyń qıyndyqtaryn artta qaldyrdyq. Qol, moıyn, arqany shynyqtyrdyq. Katıa demalý jattyǵýlaryn jaqsy meńgerip aldy. Búginnen bastap júktemeni kóbeıte bastadyq. Nátıje bolatynyna senimdimin. Men Katıany maqtan tutamyn!» - dedi Kıra Ýdartseva.
Onyń aıtýynsha, Ekaterına jattyǵýdan jalyqqan emes. Mundaı jattyǵýlar adamnyń bulshyqetterin protez kııýge daıyndaıdy.
Eske sala keteıik, jol apaty 16 maýsymda Almaty qalasyndaǵy Ál-Farabı dańǵylynda bolǵan. Honda CRV tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp kólikterin qarap jatqan kezde ortańǵy jolaqta kele jatqan Toyota Camry kóligin avtobýs soqqan. Soqqydan Toyota Camry kóliginiń artqy bóligi ushyp kelip Honda CRV kóligin soǵady. Saldarynan qyzdar ortada qysylyp qalyp, bireýi eki aıaǵynan aıyrylǵan bolatyn. Al ekinshi qyz №7 qalalyq aýrýhanananyń nevrologııa bólimine jatqyzyldy.
