Kólik apaty: 2 adam mert bolyp, 6 adam aýrýhanaǵa tústi - Almaty oblysy
TALDYQORǴAN. QazAqparat - Almaty-Óskemen tas jolynyń 349 shaqyrymynda keshe eki kóliktiń soqtyǵysýy saldarynan 2 adam adam qaza tapty. Taǵy 6 adam aýrýhanaǵa jetkizildi, dep habarlaıdy QazAqparat tilshisi.
Kólik apaty Aqsý aýdanyna qarasty Saǵabúıen aýylynyń mańynda bolǵan.
«Eki adam kóz jumdy. Bireýi oqıǵa ornynda, ekinshisi aýrýhanada. Jalpy eki kólikte tórt-tórtten 8 adam bolǵan. 6 jolaýshynyń barlyǵy aýrýhanaǵa tústi. Ekeýi Aqsý aýdanyndaǵy, qalǵan 4-eýi oblystyq aýrýhanaǵa jetkizildi», - dedi Aqsý aýdany ákimdiginiń baspasóz hatshysy Qurmet Dosjanova.
Aıta ketý kerek, jol-kólik oqıǵasynda «Mitsubishi space wagon» jáne «toyota camry» mashınalary soqtyǵysqan.
Aldyn ala boljam boıynsha, kólik apatyna aýa-raıynyń qolaısyzdyǵy áser etken. «Mitsubishi space wagon» kóliginiń júrgizýshisi rýlge ıe bola almaı qarsy baǵytqa shyǵyp ketip, «toyota camry» kóligine soǵylǵan. Soqqynyń qatty bolǵany sonshalyq, «toyota camry» kóliginiń aldynda otyrǵan 1963 jylǵy jolaýshy til tartpaı ketken.
