Kólik apattarynyń 95 paıyzy júrgizýshilerdiń kinásinen bolady - ІІM

ASTANA. QazAqparat – Kólik apattarynyń 95 paıyzy júrgizýshilerdiń kinásinen bolady. Ortalyq kommýnıkatsııalar qyzmetinde ótken brıfıngide Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova osyndaı málimet aıtty, dep habarlaıdy QazAqparat.

«Jol-kólik oqıǵalarynyń 95 paıyzy júrgizýshilerdiń kinásinen bolady. Sonymen qatar, abaısyzdyq pen salǵyrttyqtyń kesiri de bar», - dedi ІІM aǵa ınspektory.

Aqtoty Boranova júrgizýshilerdi kólikter arasyndaǵy qaýipsiz jyldamdyq pen qashyqtyq rejımderin qatań saqtaýǵa shaqyrdy.

«Aýa raıyna baılanysty taǵy bir mańyzdy másele bar. Ásirese, soltústik aımaqtarda kólik ıelerine aýa raıynyń ózgerýin muqııat baqylaý kerek. Kún raıy nasharlaǵan jaǵdaıda, eldi mekenderden tys saparlardy shekteý kerek», - dedi ol.