Kólik akkýmýlıatoryn urlaýmen aınalysatyn eki kúdikti qolǵa tústi
NUR-SULTAN. QazAqparat - Elordanyń polıtsııa qyzmetkerleri birneshe akkýmýlıatordy qoldy qylǵan kúdiktilerdi ustady, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.
Sońǵy ýaqytta azamattardan akkýmýlıator urlyǵy týraly aryz-shaǵymdar jıi túsip otyrǵan. Urlyq túngi mezgilde, ásirese dabyl belgisi joq avtokólikterde jıi boldy.
«Krımınaldyq polıtsııa qyzmetkerleri jedel-izdestirý sharasynyń nátıjesinde eki kúdiktini ustady. Qazirgi tańda QR Qylmystyq kodeksiniń «Urlyq» baby boıynsha tergeý júrip jatyr. Zattaı aıǵaq tárkilendi. Sonymen qatar, kúdiktilerdiń buryn elorda aýmaǵynda jasalǵan osyǵan uqsas qylmystarǵa qatysy bar-joǵy tekserilýde» delingen habarlamada.
Atalǵan azamattardyń zańǵa qaıshy áreketinen zardap shekken azamattar bolsa, Nur-Sultan qalasy polıtsııa departamentine júginýine nemese 8 (7172) 8 (7172) 71-60-24, 71-61-07, 102 telefondaryna habarlasýyna bolady.
Polıtseıler azamattardy óz múlkine muqııat qarap, urylardyń áreketinen barynsha saq bolýǵa shaqyrady. Avtokólikti arnaıy dabyl belgisimen jabdyqtap, kúzetiletin qaýipsiz aýmaqqa qoıǵan jón.
