Kóliginiń nómirinde týdyń belgisi kórinbegen aqtaýlyqqa aıyppul salynýy múmkin
ASTANA. QazAqparat - Ǵalamtorda Qazaqstan týy kórsetilmegen memlekettik nómiri bar Aqtaý avtomobıliniń fotosy jarııalandy. Qoldanýshylar polıtsııa qyzmetkerleriniń shara qoldanbaǵanyna tańdanys bildirgen. Aqtaý ákimshilik polıtsııa basqarmasy men mamandandyrylǵan HQO habarlaýynsha, QR ÁQBK 590-babynyń 1-bóligine sáıkes (Memlekettik tirkeý nómiri belgileri (belgisi) oqylmaıtyn nemese standart talaptary buzyla otyryp ornatylǵan, tirkelgen kólik quralyn basqarý) 5 AEK - 10 605 teńge kóleminde aıyppul qarastyrylǵan, dep jazady lada.kz.
Mundaı nómirler kólik ıesi jáne eki kýágerdiń qatysýymen alynýy kerek, dep habarlady ákimshilik polıtsııa. «Jol polıtsııasy qyzmetkeri kólikti toqtatqan sátte-aq, atalǵan bap boıynsha kólik ıesine hattama toltyrylady. Aıyppul tólengen soń, júrgizýshi ákimshilik polıtsııa basqarmasyna nómirlik belgini ózgertý týraly ótinish jazady», - dedi Mańǵystaý oblysy ІІD ÁPB basshysy Ulyqbek Myltyqov.
Mamandandyrylǵan HQO-nyń habarlaýynsha, eger nómirlik belgige jol-kólik apatynan zaqym kelse nemese ishinara sandary óship qalsa, kóshirmesin jasatý kerek. «Nómirlik belgini qalpyna keltirýde tehnıkalyq qujatty ózgertýdiń qajeti joq. Nómir úshin qarastyrylǵan memlekettik baj salyǵyn - 5 938 teńge tóleý qajet», - dedi mamandandyryǵan HQO bas mamany Arman Musabaev.
