Kóliginen jolǵa qoqys laqtyryp ketken petropavldyq aıyppul tóledi
PETROPAVL. QazAqparat – Petropavl turǵyny kóliginiń terezesinen qoqys tastaǵany úshin aıyppul tóledi, dep habarlaıdy QazAqparat tilshisi.
Soltústik Qazaqstan oblysy polıtsııa departamentiniń málimetinshe, Petropavl turǵynynyń «Toyota Camry» kóliginen jolǵa qoqys laqtyrǵan teris qylyǵyn basqa kólik júrgizýshisi túsirip, beınejazbany áleýmettik jelige ornalastyrǵan. Qyzyljar aýdanynyń ýchaskelik polıtsııa ınspektorlary ákimshilik yqpal etý sharasyn qoldaný úshin kóliktiń júrgizýshisin anyqtady.
Er adamnyń aıtýynsha, ol áleýmettik jelidegi beınejazbany kórip, qandaı sebeppen polıtsııa qyzmetkeriniń qońyraý shalǵanyn birden túsingen.
«Petropavl turǵyny jasaǵan quqyq buzýshylyǵy úshin keshirim surap, aıyppul tóledi. Aıyppul mólsheri 1 AEK mólsherinde, ıaǵnı 3 myń teńge shamasynda. Ol Beloe eldi mekenine jaqyndaı bere kólik terezesinen qoldanylǵan stakandardy tastaǵanyn aıtty», - deıdi Qyzyljar aýdanynyń ýchaskelik polıtsııa ınspektory Tagır Shakırjanov.
QR Ákimshilik quqyq buzýshylyq týraly kodeksiniń 630-baby boıynsha jolǵa qoqys tastaý aıyppul salýǵa ákep soǵady. SQO-da jyl basynan osy bap boıynsha 101 hattama toltyryldy.
