Kóligine ksenon taqqan 800-den astam atyraýlyq júrgizýshi jazalandy
ATYRAÝ. QazAqparat – Atyraýda kóligine ksenon, led shamdaryn taqqan 800-den astam júrgizýshi jazalandy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetine súıensek, jolda júrý erejesin buzýshylar arasynda kóligine ksenon, led shamdaryn salǵan júrgizýshiler kóbeıgen. Jyl basynan beri osyndaı 800-den astam júrgizýshi anyqtalyp, ákimshilik jaýapkershilikke tartylǵan.
«Mundaı jaryq shamdaryn qondyrǵan kólik júrgizýshileri joldyń qarsy baǵytyndaǵy qozǵalys qaýipsizdigine keri áserin tıgizip, kóptegen narazylyq týdyrady. Máselen, 4 qyrkúıekte saǵat 22:04 shamasynda S.Datov-Sh.Ýálıhanov kósheleriniń qıylysynda «Kia Cerato» markaly avtokóligi toqtatyldy. Tekserý kezinde 33 jastaǵy júrgizýshiniń kóligindegi ksenon shamyn jaǵyp, kele jatqany anyqtaldy. Júrgizýshi mundaı buzýshylyqty ekinshi ret qaıtalaǵany belgili boldy. Atalǵan júrgýzshige qatysty QR Ákimshilik quqyqbuzýshylyq týraly Kodeksiniń 590-babynyń 5-bólimimen (Syrtqy jaryq berý aspaptar derekteri kólik quralynyń konstrýktsııa talaptaryna sáıkes kelmeıtini úshin) ákimshilik hattama toltyrylyp, 14 585 tenge kóleminde aıyppul salyndy» -dep habarlady departamenttiń baspasóz qyzmetinen.
Eske sala ketelik, budan buryn Atyraýda aıyppulyn tólemeı júrgen 26 júrgizýshi ustalǵan bolatyn.
