Kóligine ıt baılap, súıregen júrgizýshige qatysty hattama toltyryldy

ShYMKENT. QazAqparat - Shymkenttik polıtseıler áleýmettik jelige monıtorıng júrgizý barysynda belgisiz adamnyń qala kósheleriniń birinde Opel Astra avtokóligine baılanǵan ıtti súırep bara jatqan beınejazbaǵa nazar aýdardy, dep habarlaıdy QazAqparat.

«Jedel basqarý ortalyǵynyń ınspektorlary «Qorǵaý» qosymshasynyń kómegimen kóliktiń qozǵalǵan orny men júrgizýshiniń jeke basyn anyqtady. Ol Túrkistan oblysynyń turǵyny bolyp shyqty.

Derekter Ál-Farabı aýdandyq PB-ǵa joldandy», - dep jazdy ІІM-nen.

Er adamnyń sózinshe, ol kóship jatqan. Avtokóliktiń salonynda ıtke oryn bolmaǵandyqtan, ony kólikke baılaýdy uıǵarǵan.

Júrgizýshige qatysty ÁQBtK-niń 407-2-baby boıynsha ákimshilik hattama toltyryldy. Jınalǵan materıaldar mamandandyrylǵan ákimshilik sotqa jiberiledi.

Er adammen profılaktıkalyq túsindirme jumystary júrgizildi.