Kóligińe artyq júk tıeseń, aıyppul túbirtegi úıińe keledi
ASTANA. 22 qańtar. QazAqparat - QR KKM Kóliktik baqylaý komıteti artyq júk tıegenge baılanysty aıyppuldy tóleý jónindegi uıǵarymdy otandyq tasymaldaýshylardyń poshtalyq meken-jaıyna jibere bastady,
dep habarlady vedomstvonyń baspasóz qyzmetinen.
Atalǵan tártip buzýshylyqtar júk kólikteri ótken saıyn elektrondy ólsheýish quraldary arqyly tirkeledi. Salmaq parametrleriniń artyq bolýy mınıstrliktiń ahýaldyq ortalyǵyna túsedi de avtomatty rejimde uıǵarym ázirlenip, olar qaǵaz betine túsirilip, avtokólik ıelerine jiberilip otyrady.
2013 jylǵy 20 jeltoqsannan 2014 jylǵy 20 qańtar aralyǵynda salmaq ólsheýdiń avtomattandyrylǵan júıesi arqyly jalpy somasy 1,1 mlrd. teńge quraıtyn ákimshilik aıyppul salynǵandyǵy jóninde 2271 uıǵarym jiberildi.
2013 jyly Qazaqstannyń alty óńirinde (Qostanaı, Aqmola, Qaraǵandy, Jambyl, Almaty, Qyzylorda oblystary) júk kólikteriniń salmaǵyn qozǵalys barysynda tarazylaıtyn 13 arnaýly avtomattandyrylǵan ólsheýish quraldary iske qosylǵan.
Sonymen, salmaq ólsheýdiń elektrondy júıesimen negizgi 4 halyqaralyq dáliz qamtyldy (Tashkent-Shymkent-Taraz-Almaty-Qorǵas, Almaty-Qaraǵandy-Petropavl, Astana-Qostanaı-Chelıabi-Ekaterınbýrg, Shymkent-Qyzylorda-Aqtóbe -Oral-Samara).
Bıylǵy jyly Qazaqstannyń 9 óńirinde 18 salmaq ólsheý júıesin ornatý josparlanýda (Qaraǵandy, ShQO, Qyzylorda, BQO, Aqtóbe, Mańǵystaý, Atyraý, Aqmola, Jambyl oblystary). Olar barlyq 6 halyqaralyq avtodálizderdi qamtıtyn bolady.
Elektrondy salmaq ólsheý júıelerin ornatýmen qatar kóliktik baqylaýdyń turaqty beketteri jabylatyn bolady. 2012 jylǵy qańtar men 2014 jylǵy qańtar aralyǵynda kólik jáne kommýnıkatsııa mınıstriniń buıryǵymen 11 turaqty beket jabyldy.
