Kóligin zańdastyrmaq bolǵan mańǵystaýlyq alaıaqqa 7,8 mln teńgesin berip qoıdy

ASTANA. QazAqparat – Mańǵystaý oblysynyń turǵyny shet elden ákelingen kóligin zańdastyryp beremin dep ýáde etken alaıaqqa aldynyp qaldy, dep habarlaıdy QazAqparat Polisia.kz-ke silteme jasap.

«Munaıly aýdanynyń turǵyny «kólik qujattaryn Grýzııa eliniń esebinen shyǵaryp, Qazaqstan Respýblıkasynyń esebine tirkep, rásimdep beremin» dep ýáde berip, keıin sózinde turmaǵan alaıaqtyń quryǵyna túsip qaldy.

Jábirlenýshige keltirilgen jalpy shyǵyn kólemi 7,8 mln teńgeni qurady.

Jedel-izdestirý is-sharalary nátıjesinde krımınaldyq polıtsııa qyzmetkerleri Beıneý aýdanynyń 30 jastaǵy turǵynyn anyqtap, ustady.

Atalǵan derek QR Qylmystyq kodeksiniń 190-baby (Alaıaqtyq) boıynsha tirkeldi. Ózge málimetter tergeý múddesine oraı jarııa etilmeıdi», - delingen polıtsııa málimetinde.