Kóligin artqa aıdaǵan júrgizýshi 134 myń teńge aıyppul tóleıdi
ALMATY. QazAqparat – Almaty polıtsııasy kóligin artqa qaraı aıdaǵan júrgizýshini ákimshilik jaýapqa tartty, dep habarlaıdy QazAqparat tilshisi.
20 jastaǵy jas jigit kishi Jeltoqsan kóshesimen Ál-Farabı dańǵylyna qaraı baǵyt alǵan. Bul vıdeo Instagram jelisinde taraldy.
Polıtsııa júrgizýshige qatysty 8 ákimshilik hattama toltyrdy.
«Bul joly jol erejesin buzǵan 20 jastaǵy jasóspirim bolyp shyqty. Jaqsy kadr shyǵarý úshin jol erejesin buzǵan. Endi bul áreketi úshin ol 134 myń teńge aıyppul tóleıtin boldy. Júrgizilgen profılaktıkalyq sharalardyń arqasynda osyndaı ereje buzýshylyqtyń qatary azaıǵany ras. Kóbinese jas, tájirıbesiz júrgizýshiler osyndaı áreketke barady. Bul júrgizýshimen de mamandar sóılesetin bolady. Al onyń kóligi aıyp turaǵyna jiberiledi», - dedi PD Ákimshilik polıtsııa basqarmasynyń basshysy Serikjan Ábjanov.
Sonymen qatar, júrgizýshiniń kólik basqarýǵa ruqsat beretin qujaty bolmaǵan.
