Kóligimen adamdardy qaǵyp ketken polıtseı qylmysyn moıyndamady
ShYMKENT. QazAqparat - Shymkentte bútin bir otbasyny kóligimen qaǵyp ketken polıtseı sotta qylmysyn moıyndamady. Qarataý aýdandyq sotynda qaralǵan alǵashqy otyrysta aıyptaýshy tarap pen kýágerler tyńdaldy , dep habarlaıdy QazAqparat tilshisi.
Qylmystyq isti qarap jatqan sýdıa Mombek Ámirbekovtyń aıtýynsha, Jandos Orazalınov Qylmystyq kodekstiń 345-baby 3 bóligi «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý» boıynsha aıyptalýda.
«Biz aldymen aıyptaýshy taraptyń 15 adamynan jaýap aldyq. Olardyń qatarynda prokýror men tergeýshi bar. Qos tarap ta aıyptalýshyny jol júrý erejesin óreskel buzyp, jolaýshylardy qaǵyp ketkenin aıtyp otyr», - deıdi sýdıa Mombek Ámirbekov.
Sotta jábirlenýshi taraptyń týystary ony keshirgenin aıtyp, taǵylǵan aıypty jeńildetýin suraǵanyn jetkizdi. Alaıda sýdıa bul suraqtyń ashyq kúıinde qalatynyn aıtty. Sebebi, aıyptalýshy óziniń qylmysyn sol kúıi moıyndamaǵan. Burynǵy polıtsııa qyzmetkeri jol-kólik oqıǵasy bolǵan kezde baǵdarshamnyń jasyl túsine ótkenin, al jolaýshylardy avtobýstyń kesirinen kóre almaǵanyn alǵa tartypty. Sýdıa sonymen qatar jol apaty bolǵanda júrgizýshi mas kúıinde bolmaǵanyn, isti qaraý kezinde 20 kýágerden jaýap alynatynyn atap ótti.
Eske salaıyq, kisi ólimimen aıaqtalǵan jol kólik oqıǵasy Shymkent qalasyna qarasty Jibek joly kóshesiniń boıynda bolǵan. «BMV» avtokóliginiń 32 jastaǵy júrgizýshisi joldan ótip bara jatqan bir otbasy múshelerin qaǵyp, oqıǵa ornyna kóligin tastap ketip qalǵan. Ony kýágerler uıaly telefonǵa túsirip, beınejazbasyn áleýmettik jelige salǵan edi. Jol apaty saldarynan oqıǵa ornynda 37 jastaǵy er azamat qaıtys bolyp, taǵy 36 jastaǵy áıel men onyń 7 jasar uly aýyr halde aýrýhanaǵa túsken.
Keıin jol apatyn jasaǵan Jandos Orazalıev Saıram aýdandyq ishki ister basqarmasynda anyqtaý bólimin basqaratyny belgili boldy. Avtokóliginen qarý-jaraqtar da tabylǵan edi. Alaıda keıin ol boıynsha qylmystyq is qysqartyldy. Ol jol apatynan keıin ishki ister organdarynan jumystan bosatyldy.
