Kóligi jyraǵa qulaǵan sheteldik júrgizýshige kómek kórsetildi – ShQO
ÓSKEMEN. QazAqparat – Shyǵys Qazaqstan oblysynda kóligi jyraǵa qulap ketken sheteldik júrgizýshige kómek kórsetildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetinshe, Semeı qalasynan 50 shaqyrym jerdegi Qyzymshek aýylynyń mańynda Mercedes júk kóligi jyraǵa qulap ketken. Birden sol jerge №2 órt sóndirý bóliminiń qutqarýshylary arnaıy tehnıkamen kelip jetti.
«Sheteldik júrgizýshi júk tıep kele jatqanyn aıtyp, evakýatsııadan bas tartty. Qutqarýshylar kólikti jolǵa shyǵaryp bergen soń ol ary qaraı saparyn jalǵastyrdy», - dep habarlady vedomstvo ókilderi.
Osy rette TJD óńir turǵyndaryna alys saparǵa shyqqan kezde Darmen mobıldi qosymshasy arqyly joldardyń jaı-kúıin aldyn ala bilip alýǵa keńes beredi. Sondaı-aq qandaı da bir qıyn jaǵdaıǵa tap bolǵanda «112» nómirine qońyraý shalý kerektigin eske salady.
