Kóligińizge aǵash ne jol belgisi qulasa ne isteý kerek

ASTANA. KAZINFORM — Kóligińizge aǵash ne jol belgisi qulap zaqymdaǵan jaǵdaıda shekken shyǵynyńyz ótelýge mindetti.

Mundaı jaǵdaıda ne isteý kerek

Eń aldymen, qulaǵan aǵashty nemese jol belgisin óz betińizshe alyp tastaýǵa tyryspańyz. Bul qaýipti bolýy múmkin: aǵash ústińizge qulap, jaraqat alyp qalýyńyz yqtımal. Sonymen qatar, polıtsııa qyzmetkeri kelgenge deıin aǵashty, belgini nemese kólikti jyljytýǵa tyıym salynady.
Birden «102» nómirine qońyraý shalyńyz. Polıtsııa qyzmetkerleri aǵashtyń nemese belginiń qulaý faktisin tirkep, kóligińizge qosymsha zaqym keltirmesten kedergilerdi kásibı túrde alyp tastaıtyn arnaıy qyzmetterge aqparat berýi kerek.

Polıtsııa qyzmetkerin kútip turǵan kezde:

— oqıǵa ornyn túrli qyrynan fotoǵa jáne vıdeoǵa túsirip alyńyz;
— eń durysy kúnin, saǵatyn, koordınaty men aýa raıyn tirkeıtin arnaýly qosymshalardy paıdalanǵan jón. Máselen, Timestamp Camera nemese Auto Stamper (Android pen iOS qosymshalarynda qoljetimdi).
— aǵashty muqııat qarap shyǵyńyz, eger zaqymdaný belgileri (keýip qalǵan, shirigen, kúıgen nemese kesilgen bolýy múmkin) sholyp qaraǵanda kózge baıqalsa, ony taspalap alýdy umytpańyz. Sizge jergilikti bılik ony aldyn ala alyp tastaýy kerek ekenin dáleldeý qajet bolýy múmkin. Eger kórshilerińiz ákimdikke eski nemese zaqymdalǵan aǵashty kesip tastaý týraly ótinish bildirgenin rastaıtyn qujat bolsa, onda tipti jaqsy.

Eger jol belgisi mashınańyzdyń ústine qulap ketse, onda onyń qalaı bekitilgenin tekserýińiz kerek — eger jol belgisi jerde tursa, onda irgetastasyn sýretke túsirip alyńyz, al eger ol ankerge nemese arnaıy qurylymǵa ornatylǵan bolsa, onda betitilip turǵan bóligin taspalaǵanyńyz jón. Bekitkishterdi jáne jol belgisi bekitilgen oryndy túsirip alý mańyzdy.
Oryn alǵan jaıt faktisi qujattalyp, kóligińizden aǵash nemese jol belgisi alynyp tastalǵannan keıin, barlyq shyǵynyńyzdy tirkeı bastańyz — bul soma tolyǵymen ótelýi tıis. Eger kóligińiz júrýge jaramsyz bolyp qalyp, tasymaldaýǵa týra kelse, onda evakýatordan chek surańyz, odan keıin kóligińizdi jóndeıtin tehnıkalyq qyzmet kórsetý ortalyǵynan da qujat alýdy umytpańyz. Táýelsiz baǵalaýshy izdeńiz (arnaıy kompanııaǵa habarlasyp, al olardyń nómirin jarnama saıttarynan ala alasyz nemese saqtandyrý kompanııasy ókilinen baılanys nómirin surap alýǵa bolady.

Saqtandyrý

Avtokólikti mindetti saqtandyrý mundaı shyǵyndardy tolyǵymen óteı almaıdy. Mundaı jaǵdaıda sizge tek erikti saqtandyrý jáne onyń jazataıym oqıǵa ekenin dáleldeý ǵana kómektese (fotosýretter men beınetaspalar kádege jaraıdy) alady. Eger jaqyn jerde beınebaqylaý kameralary ornatylǵan bolsa, onda olardan alynǵan kadrlar da keremet kómekshi bolar edi.

Eger saqtandyrý shyǵyndaryńyzdy tolyq ótemese, onda turǵylyqty jerińiz boıynsha ákimdikke júginýińiz qajet. Muny onlaın rejıminde jasaýǵa nemese jazbasha ótinish jazýǵa bolady. Sizge jasyl jelekterdi kútip ustaýǵa jáne qorǵaýǵa kim jaýapty ekenin anyqtaý qajet. Kóbinese bul jergilikti ákimdiktiń bólimsheleriniń quziretine kiredi. Barlyq jol belgisi de qalanyń menshiginde. Sońǵy kezeńde sotqa deıingi talap jazý qajet. Eger ony elemese nemese zalaldy tóleýden bas tartsa, onda siz keltirilgen zııan men zalaldy óteý týraly sotqa senimdi túrde júgine alasyz.
Sondaı-aq, kólik quraly jol qozǵalysy erejelerin buza otyryp turaqta tursa da, sizge kelgen shyǵyn somasyn tolyq kólemde tóleýge mindetti ekenin qaperden shyǵarmańyz. Kólik durys turmasa da aǵash nemese jol belgisi qulamaýy tıis. Árıne, bul jaǵdaıda siz polıtsııa shaqyrǵan kezde qyzmetkerler eki hattama jasaıdy — bireýimen qulaý faktisin tirkep, al ekinshisimen kóligińizdi durys qoımaǵanyńyz úshin aıyppul salady.

Buǵan deıin úıdi órt, zilzala, urlyq pen joǵary qabattaǵy kórshiniń sý aǵyzyp jiberýinen saqtandyrýǵa bolatynyn jazǵan edik. 

Qazirgi kezde elimiz boıynsha saqtandyrý tarıfi (bir kompanııanyń ártúrli aımaqtaǵy baǵasy) shamalas bolyp keledi. Saqtandyrýshylar jyljymaıtyn múliktiń naryqtaǵy baǵasynyń 0,1% — 0,35% aralyǵyndaǵy baǵany usynady. Máselen páter baǵasy 30 mln teńge bolsa, saqtandyrý kompanııasy qyzmeti úshin jylyna 24-90 myń teńge aralyǵynda aqy suraıdy.
Sonymen qatar taıaýda jarııalanǵan QR Ulttyq bankiniń ekonomıkalyq sholýy» basylymynda dúleı zilzalalardan saqtandyrýda Qazaqstan úshin Túrkııa tájirıbesi qolaıly ekendigi aıtylǵan.