Kóligińizdi toqtatqan saqshy qandaı qujattardy kórsetýge mindetti – Ákimshilik polıtsııa jaýaby

ASTANA. KAZINFORM – ІІM Ákimshilik polıtsııa komıtetiniń tóraǵasy Qaısar Sultanbaev ortalyq kommýnıkatsııalar qyzmetinde ótken baspasóz máslıhatynda kólik toqtatýǵa negiz bolatyn polıtsııa qujattary týraly túsinikteme berdi.

«Jol júrisi týraly» Zańnyń 52-babynda kólik quralyn toqtatýdyń negizderi men tártibi, sondaı-aq polıtsııanyń is-qımyl rettiligi belgilengen.

Máselen, jedel aldyn alý is-sharalaryn júrgizý kólik quralyn toqtatý úshin negiz bolyp tabylady. Odan keıin polıtsııa qyzmetkeri jaqyndap, ózin tanystyryp, qajet bolsa júrgizýshige qyzmettik kýáligin kórsetip, toqtatý sebebin túsindirýge mindetti.

Eger júrgizýshiniń zań talaptaryn nemese jol erejelerin buzýy sertıfıkattalǵan arnaıy tehnıkalyq quraldarǵa tirkelse, júrgizýshige tanysý úshin materıaldardy kórsetedi.

Polıtsııa qyzmetkeri atalǵan áreketterdi oryndaǵannan keıin júrgizýshi qyzmetkerdiń zańdy talaptaryn oryndaýǵa mindetti.

Osylaısha, polıtsııa qyzmetkeriniń mindetterinde júrgizýshige jedel-profılaktıkalyq is-sharany ótkizý týraly qujatty usyný týraly talap joq», - dedi komıtet basshysy.

Qaısar Sultanbaev keıbir blogerlerdiń jol saqshylary júrgizetin jedel is-sharalar kestesin kópshilikke jarııalaýy qylmyskerlerge qolaıly ekenin aıtady. 

«Mundaı áreket ásirese urlyq, esirtki, brakonerlik sııaqty qylmystardy toqtatýǵa kedergi keltiredi. Qarapaıym tilmen aıtqanda, biz kesteni kópshilikke jarııalaý arqyly qylmyskerlerge josparymyzdy aldyn ala habarlaımyz degen sóz.

Profılaktıka maqsatymen ótkiziletin is-sharalardy biz aqparat quraldarynda aldyn ala jarııalaımyz. Mysaly, «Abaılańyz-balalar!», «Avtobýs», «Zorlyq-zombylyqsyz 16 kún», «Men seniń ýchaskelik ınspektoryńmyn» jáne basqalar», - dedi ІІM ókili.