Kóligin ótirik tehnıkalyq tekserýden ótkizgenderge aıyppul 370 myń teńgege deıin ósedi
ASTANA. KAZINFORM - Kólik mınıstrligi avtomobılin jalǵan tehnıkalyq tekserýden ótkizgenderge aıyppul 100 AEK-ke deıin ulǵaıtylatynyn habarlady.
Zań jobasy sheńberinde Ákimshilik quqyq buzý týraly kodekste avtokólikti jalǵan tehnıkalyq tekserýden ótkizýge aıyppuldy 30 aılyq eseptik kórsetkishten 100 AEK-ke (369 200 teńge) deıin ulǵaıtý kózdelgen.
Kólikti jalǵan tehnıkalyq tekserýden ótkizýdiń saldary aqaýy bar kóliktiń jol qozǵalysyna jiberilýine múmkindik berip, keıin bul jol apatyna, onyń ishinde sońy ólimge ulasatyn oqys oqıǵalar deńgeıiniń ósýine ákep soǵady.
Mamandardyń aıtýynsha, salynatyn aıyppul kólemi jasalǵan quqyq buzýshylyqtarǵa proportsıonaldy bolýy tıis jáne buzýshylyqtardyń odan ári jasalýynyń aldyn alýy kerek.
Ákimshilik jaza qoldanylǵannan keıin bir jyldyń ishinde qaıtalap jasalsa, tehnıkalyq tekserýden ótkizetin operator qyzmet kórsetý quqyǵynan 3 jylǵa deıingi merzimge aıyrylady.
Sondaı-aq atalǵan zań jobasy sheńberinde avtokólikti tehnıkalyq tekserýden ótkizetin operatorlardyń qyzmetine qoıylatyn talaptardy kúsheıtý kózdelgen.
Joǵaryda atalǵan ózgertýler men tolyqtyrýlardy engizý avtokólik quraldaryn mindetti tehnıkalyq baıqaýdan ótkizý sapasyn jaqsartýǵa jáne josyqsyz tehnıkalyq qarap tekserý operatorlarynyń sanyn 2 esege qysqartýǵa múmkindik beredi.
Aıta keterligi, búgingi tańda naryqta 950-qa jýyq operator kólikti tehnıkalyq tekserýden ótkizý qyzmetin kórsetedi.
