Kólginovtiń ýádesi: Berezovka men Bestaýda qalǵan sońǵy otbasylar qazanda kóshiriledi
ASTANA. QazAqparat - Berezovka men Bestaý azamattary jańa páter alǵannan keıin eski úılerinen zattaryn alyp ketýge 6 apta ýaqyt beremiz. Bul týraly búgin Ortalyq kommýnıkatsııalar qyzmetindegi brıfıngte Batys Qazaqstan oblysynyń ákimi Altaı Kólginov aıtty, dep habarlaıdy QazAqparat.
«Bestaý men Berezovka aýyldarynda osydan birneshe jyl buryn birqatar qıynshylyqtar bolǵan. Endi bul eldi mekender jańa ekologııalyq aımaqqa kirip otyr. Birinshi qańtardan bastap ol jerlerde eshkim turmaýy tıis. Sondyqtan birinshi kezeńde 2015 jyly 80 otbasy kóshirilgen bolatyn. Qazir ekinshi kezeńi qaldy. Ol aýyldarda 373 otbasy kóshirýdi kútip otyr», - dedi oblys basshysy.
Onyń aıtýynsha, búginde Qarashyǵanaq ken ornynyń qarajaty esebinen bir qabatty 100 úı salynyp, oǵan 100 otbasy kóshirilgen.
«Sonymen birge árqaısysy 153 páterden 9 qabattty eki úı bar. Olardy salý jumystary aıaqtalyp, qujattaryn rásimdeý jumystary júrgizilýde. Biz otbasylarǵa páterlerdi bólip berý jáne kelisimsharttardy jasaý jumystaryn bastap kettik. Osy aıdyń sońyna deıin ol jumystar aıaqtalatyn bolady. ıAǵnı, barlyq otbasylar óz páterleriniń kiltin alady. Al kelisimshartqa sáıkes jańa páter alǵannan keıin Berezovka men Bestaý azamattaryna eski úılerinen zattaryn alyp ketýge 6 apta ýaqyt beremiz. Sebebi 6 aptadan keıin biz ol aýyldardaǵy úılerdiń barlyǵyn buzamyz. Ol jerde eshkim turmaýy tıis», - dedi Altaı Kólginov.
