Kólginov: Turǵyn úı kezegindegilerge jalǵa beriletin baspana balalaryna qalady
NUR-SULTAN. QazAqparat - Elorda ákimi Altaı Kólginov azamattardy qabyldady, dep habarlaıdy QazAqparat qala ákimdiginiń resmı saıtyna silteme jasap.
Turǵyndar turǵyn úı baǵdarlamalaryna qatysý, medıtsınalyq kómek pen ataýly áleýmettik kómek alý, jumysqa ornalasý jáne t. b. máselelerdi kóterdi. Elorda ákimi Altaı Kólginov jalǵa beriletin turǵyn úıdi bes jyldan keıin qaıtarý qajet emes ekendigin aıtty. «Qoljetimdi baspana - biz úshin basym baǵyttardyń biri. Memleket basshysynyń tapsyrmasyna sáıkes bıyl qoljetimdi turǵyn úı qurylysynyń kólemin úsh ese ulǵaıtamyz. Ótken jyly 2900 turǵyn páter aldy.
Jalǵa beriletin turǵyn úı týraly aıtatyn bolsaq, úıdi bes jyldan keıin bosatýdyń qajeti joq.Úı sizdiń balalaryńyzǵa qalady. Tek 5 jyl ótken soń shartty uzartý qajet. Al jumys isteıtin jastarǵa arnalǵan jalǵa beriletin baspanaǵa kelsek, bul úıler 5 jyl merzimge beriledi. Osy ýaqyt ishinde jumys istep jatqan jastar aıaqqa turyp, basqa turǵyn úı baǵdarlamalaryna qatysyp ne turǵyn úı satyp alý úshin tájirıbe men qarajat jınaı alady», - dedi Altaı Kólginov. Elorda ákimi 3 kún boıy eseptik kezdesýge kelgen qala turǵyndaryn jeke qabyldady. Suraqtardyń bir bóligi sol jerde sheshilse, qalǵandary jumysqa alyndy.