Kólginov elordalyqtardan qalany damytý boıynsha ıdeıalarymen bólisýdi surady
NUR-SULTAN. QazAqparat - Elorda ákimdigi júzege asyryp jatqan jobalar boıynsha birlesken sheshimder qabyldaý úshin onlaın-platforma ashyldy. Bul týraly qala basshylyǵynyń baspasóz qyzmetinen málim etti, dep habarlaıdy QazAqparat.
Ashyqalan.kz ınternet-platformasy bıznes, memleket jáne jalpy qoǵam aldynda turǵan mindetterdi sheshý úshin aqparattyq tehnologııalar arqyly halyqtyń resýrstaryn jumyldyrýǵa arnalǵan. Interaktıvti onlaın-platforma memlekettik organdar belgilegen taqyryptar boıynsha múddeli adamdardy biriktirip, olardyń óz ıdeıalaryn usynýyna, túsinikteme berýine, talqylaýyna jáne tańdaýyna múmkindik beredi.
«Memleket basshysy azamattardyń barlyq ótinishterine jedel jaýap berý jáne kommýnıkatsııanyń jańa formalaryn paıdalanýdy ákimderge basty mindetterdiń biri etip qoıyp otyr. Nur-Sultan qalasynyń ákimdigi jáne jeke ózim árqashan turǵyndar men bizdiń áriptesterimizdiń ózara áreketin barynsha tıimdi ári nátıjeli etýge tyrysamyz», - dedi elorda ákimi Altaı Kólginov.
Shahar basshysy turǵyndardy ózderiniń ıdeıalaryn belsendi túrde usynýǵa jáne qalany jaqsartýǵa atsalysýǵa shaqyrdy.
«Elorda damýynyń birlesken eń jaqsy joldaryn tabý úshin bilimimiz ben tájirıbemizdi ortaǵa salaıyq. Biz úshin súıikti qalamyzda turatyn, jumys jasaıtyn, bilim alatyn jáne demalatyn adamdardyń pikirin bilý mańyzdy. Árbir pikir eskerýsiz qalmaıdy. Eń jaqsy ıdeıalar júzege asyrylady», - dedi A. Kólginov.
Azamattardyń ınternet-platformaǵa jibergen ıdeıalary saraptamalyq irikteýden, talqylaýdan jáne daýys berýden ótedi. Іrikteýden ótken ıdeıalar júzege asyrylatyn bolady.
