Kolesnıkov isi: jaralanǵan sottalýshy qaıda bardy, taksı júrgizýshisine 100 myń teńge ne úshin aýdaryldy

Shymkentte 40 jastaǵy Vasılıı Kolesnıkovty urlaý jáne óltirý isi boıynsha sot talqylaýy jalǵasyp jatyr. Іsti Shymkent qalasynyń qylmystyq ister jónindegi mamandandyrylǵan aýdanaralyq sotynyń sýdıasy Ábinur Qarabaev qarap jatyr. Ekinshi sot otyrysynda 20 qańtardaǵy jappaı tóbelesten keıingi alǵashqy saǵattarda sottalýshylardyń áreketine qatysty mán-jaılar naqtylandy.

Jaralanǵan Álıhan Erimbet Ordabasy aýdany Qaınar aýylyndaǵy medıtsınalyq pýnktte tekserýden ótken. Odan keıin ol Bekasyl Jumanazarmen birge Temirlan aýylyndaǵy aýrýhanaǵa barǵan, keıin Shymkentte tekserýden ótken.

Keıin olarǵa Jandilda Qýandyqov ta qosyldy. Úsheýin de Tashkent tasjolynyń boıynda ornalasqan Aqtas turǵyn alabyna jetkizgen.

«Quladym, temir zat tıip ketti dedi»: tórt-bes mınýttyq tekserý jáne rentgenge jiberý

Ordabasy aýdany Qaınar aýylynyń emhanasynyń medıtsına qyzmetkeri Ásel Jýraevanyń aıtýynsha, 20 qańtarda onyń aýysymy saǵat 16:30–da aıaqtalǵan. Ol eki medbıkemen birge qujattardy toltyrý úshin emhanada qalǵan. Biraz ýaqyttan keıin emhanaǵa buryn kórmegen eki er adam kelgen. Olardyń bireýi kabınet aldynda qalǵan, al Álıhan Erimbet qabyldaýǵa kirgen. Sotta Jýraeva teksergen adamnyń dál Erimbet ekenin rastady. Ol sol jaq keýde tusyn kórsetip, qulaǵanyn jáne oǵan temir zat tıip ketkenin aıtqan.

— Sol jaqtaǵy jetinshi jáne segizinshi qabyrǵalardyń arasynan kólemi 7-8 mıllımetr bolatyn jyrtylǵan jara kórdim. Basqan kezde aýyrsynatynyn aıtty. Qan ketpegen, jara arqyly aýa ótpegen. Shuǵyl medıtsınalyq kómek qajet ekenin kórsetetin belgilerdi baıqamadym. Alaıda tekserýsiz ishki aǵzalardyń zaqymdanǵanyn joqqa shyǵara almaıtyn edim. Sondyqtan ony keýde qýysynyń shuǵyl rentgenine jiberdim, — dedi Ásel Jýraeva.

Tekserý tórt-bes mınýtqa sozylǵan. Qabyldaýdan keıin Erimbet ketip qalǵan. Jýraeva ony budan keıin kórmegen. Kýáger olardyń qandaı kólikpen kelgenin jáne keıin qaıda ketkenin bilmeıtinin aıtty.

Aldymen kýáger olardyń shamamen saǵat 17:00–de kelgenin aıtqan. Alaıda advokat ýaqytty naqtylaýdy surap, keıin Erimbet pen Bekasyl Jumanazardy Temirlan aýylyna aparǵan taksı júrgizýshisi Azız Tóltaevtyń telefonyndaǵy bazalyq stantsııalar derekterine silteme jasady. Qorǵaýshynyń aıtýynsha, saǵat 17:00 shamasynda Tóltaev atalǵan baǵytta kele jatqan.

— Segiz aıǵa jýyq ýaqyt ótti, sondyqtan naqty ýaqytyn esime túsire almaımyn. Múmkin, olar saǵat besten on mınýt buryn nemese on mınýt ótkende kelgen shyǵar, — dep naqtylady Ásel Jýraeva.

«Olardy taksı júrgizýshileri jınalatyn jerge jetkizip, birden qaıttym»: Asylbek Kertaı

Qorǵaý tarapy Álıhan Erimbet pen Bekasyl Jumanazardyń emhana mańyna qashan kelgenin naqtylaý úshin Asylbek Kertaıdy sotqa shaqyrdy. Shamamen saǵat 16:30–da ol medbıke bolyp jumys isteıtin anasy Rabıǵa Abdýllaevany emhana ǵımaratynyń janynda kútip turǵan. Erimbetti tekserý kezinde onyń anasy Ásel Jýraevanyń qasynda bolǵan. Kertaı Erimbet pen Jumanazardyń emhanadan shyqqanyn kórgen. Ekeýi odan Ordabasy aýdanyndaǵy Temirlan aýylyna jetkizýin suraǵan.

— Olar áýeli kóligim bar-joǵyn surap, keıin Temirlanǵa deıin jetkizip salýdy ótindi. Men anamdy jumystan keıin kútip turǵan edim, sondyqtan ondaı jerge bara almadym. Sur tústi VAZ-2115 kóligimen olardy «Mıras» dúkenine apardym. Ol jerde taksı júrgizýshileri jınalady. Olardy túsirip, birden emhanaǵa qaıtyp kettim, — dedi Asylbek Kertaı.

Kýáger er adamdardy túsirgennen keıin birden ketkendikten, olardy ári qaraı kim alyp ketkenin kórmegen. Sol kúni ol Maqsut Arysbaevty Erimbet pen Jumanazardyń qasynda kezdestirmegen.

«Tóbelesip qaldyq, birdeńe búıirine tıgen»: Azız Tóltaev ne aıtty

Asylbek Kertaıdyń sottaǵy jaýaby Azız Tóltaev naqty aıta almaǵan bir jaıtty anyqtady. Taksı júrgizýshisi Álıhan Erimbet pen Bekasyl Jumanazardyń «Mıras» dúkenine sur tústi kólikpen kelgenin kórgen, biraq onyń VAZ-2114 nemese VAZ-2115 bolǵanyn ajyrata almaǵan. Kertaı olardy óziniń sur tústi VAZ-2115 kóligimen jetkizgenin rastady.

Sol kúni Azız Tóltaev ákesiniń ornyna taksı júrgizip, Qaınar aýyly men Shymkent arasynda jolaýshylar tasymaldaǵan. Shamamen 16:30–17:00 aralyǵynda Erimbet pen Jumanazar dúkenniń janynda oǵan kelip, qalaǵa jetkizip salýyn suraǵan.

— Olar budan sál buryn tóbeleskenderin jáne Álıhannyń búıirine birdeńe tıgenin aıtty. Kimmen tóbeleskenderin túsindirmedi. Qatty qan ketýdi kórmedim. Álıhan ózin qalypty sezindi, ózi júrip-turdy jáne medıtsınalyq mekemelerge ózdiginen kirip júrdi, — dedi Azız Tóltaev.

Aldymen olar Ordabasy aýdanyndaǵy Temirlan aýylynyń ortalyq aýdandyq aýrýhanasyna barǵan. Erimbet pen Jumanazar ǵımaratqa kirgen, al Tóltaev kólikte shamamen 30-40 mınýt kútken.

Aýrýhanadan keıin olar Shymkentke qaraı bet alǵan. Jolda ınternet arqyly Qatyn kópir shaǵynaýdanyndaǵy medıtsınalyq ortalyqty tapqan. Ol jerge tek Erimbet tekserilýge kirgen. Taksı júrgizýshisi ony 40 mınýttan bir saǵatqa deıin kútken. Tóltaev naqty qandaı tekserý jasalǵanyn aıta almady. Jaýap berý barysynda ol MRT, KT jáne ÝDZ-ny atady.

Jol boıynda jolaýshylar telefonmen sóılesken. Olardyń kimmen sóıleskenin jáne ne týraly áńgimeleskenin kýáger estimegen. Áńgime barysynda Maqsut Arysbaevtyń aty atalmaǵan. Tóltaev jolaýshylardyń qolynda qandaı da bir zat bolǵanyn baıqamaǵan.

Sottaǵy jaýap alý kezinde Azız Tóltaevtyń bank shotyna qatysty málimetter jarııa etildi. Onyń Kaspi shotyna 100 myń teńge túsken. Kýágerdiń aıtýynsha, bul aqshany jolaýshylardyń ótinishi boıynsha ózine beıtanys adam aýdarǵan.

— Aqshany meniń Kaspi shotyma aýdardy. Onyń 13 myń teńgesine MRT úshin QR arqyly tóledim. Sodan keıin 77 myń teńgeni qolma-qol alyp, jolaýshylarǵa berdim, — dedi Azız Tóltaev.

Aqshany ol Shymkent halyqaralyq áýejaıynyń jańa termınalyna bara jatqan jolda, qalanyń batys bóligindegi bankomattan alǵan. Bank kóshirmesinde saǵat 19:22–de aqsha alynǵany kórsetilgen.

Kýáger qalǵan 10 myń teńgeniń qalaı jumsalǵanyn túsindire almady. Tóltaev jolaýshylardyń jol aqysyn tólegenin de rastady, biraq naqty qansha tólegenin jáne qalaı esep aıyrysqanyn aıtpady. Sotta bul tólemniń qalǵan aqshaǵa qatysy bar-joǵy anyqtalǵan joq.

«Álıhannyń jaralanǵanyn bilmedim»: Nurlyjan Qudaıbergenov

Nurlyjan Qudaıbergenov Bekasyl Jumanazardy, Álıhan Erimbetti, Maqsut Arysbaevty jáne Jandilda Qýandyqovty tanıtynyn aıtty. Kýágerdiń sózinshe, olardyń barlyǵy bir aýylda ósken.

Shamamen saǵat 19:00–de Jumanazar Qudaıbergenovke telefon shalyp, áýejaı jaqqa baratyn jol boıyna kelýin suraǵan. Kýáger Ordabasy aýdanynan óziniń kók tústi Mercedes-Benz W210 kóligimen shyqqan. Jolǵa shamamen 40 mınýt ketken. Kezdesý ornyna saǵat 20:00–ge az ýaqyt qalǵanda jetken.

Aldymen kólikke Erimbet pen Jumanazar otyrǵan. Eki-úsh mınýttan keıin Jandilda Qýandyqov jaıaý kelgen.

— Olar meni Aqtasqa aparýymdy surady. Jol boıynda bolǵan jaǵdaı týraly eshteńe aıtpady. Álıhannyń jaralanǵanyn bilmedim. Olardy aıtqan jerine jetkizdim, keıin túnde Qaınar aýylyna qaıtyp keldim, — dedi Nurlyjan Qudaıbergenov.

Tashkent tasjolynyń boıyndaǵy Aqtas turǵyn alabyna deıingi jol shamamen bir jarym saǵatqa sozylǵan. Qudaıbergenov naqty mekenjaıdy esine túsire almady, biraq barǵan jerin kórsetip bere alatynyn aıtty.

Jolaýshylardyń jaǵdaıy onyń alańdaýyna sebep bolmaǵan. Olar bolǵan tóbeles týraly eshteńe aıtpaǵan jáne bul saparyn nemese qaı jerde júrgenin jasyrýdy suramaǵan.

Qudaıbergenov shabýyldyń vıdeojazbasyn sol kúni keshke Instagram-nan kórgen, biraq kadrlardan eshkimdi tanymaǵan. Kelesi kúni tanysy oǵan ózi aparǵan er adamdardyń oqıǵaǵa qatysy bolýy múmkin ekenin aıtqan. Vıdeony qaıta kórgenimen, kýáger olardyń eshqaısysyn tanı almaǵan.

Sot 36 tomdyq istiń jartysynan kóbin zerttedi

Densaýlyǵyna baılanysty marqumnyń ákesi Aleksandr Kolesnıkov ár sot otyrysyna qatysa almaıdy. Jábirlenýshi taraptyń múddesin advokat Talǵat Esimov qorǵaýdy jalǵastyrady. Kolesnıkov bolmaǵan kezde ol sot otyrystaryna qatysyp, kýágerlerge suraq qoıady.

Ekinshi sot otyrysynyń sońyna qaraı sot 36 tomnan turatyn qylmystyq istiń materıaldarynyń jartysynan kóbin zerttep úlgerdi. Kelesi sot otyrysy 14 qyrkúıekke belgilengen.

Eske salaıyq, negizgi sot protsesi 7 qyrkúıekte bastalǵan. Birinshi kúni úsh jábirlenýshiden jáne tórt kýágerden jaýap alynyp, tórt tom is pen eki beınejazba zertteldi.

Qorǵaý tarapy sondaı-aq Aleksandr Kolesnıkovtyń qoly qoıylǵan, notarıaldy túrde rásimdelgen aryzdy usyndy. Qorǵaý tarapy jarııalaǵan mazmunǵa qaraǵanda, onda sottalýshylardyń birin keshiretini jáne oǵan qatysty talap-tilegi joq ekeni jazylǵan.

Aldymen marqumnyń ákesi mundaı qujatty esine túsire almaıtynyn aıtty. Qujatpen tanysqannan keıin ol qoltańbasynyń ózine tıesili ekenin rastady, alaıda aryzǵa qashan jáne qandaı jaǵdaıda qol qoıǵanyn esine túsire almady.

Іs boıynsha alty adam sot aldynda jaýap berip jatyr, olardyń beseýi buǵan deıin sottalǵan. Marat Daýlasov izdeýde. Al «Baha» degen atpen belgili taǵy bir boljamdy sybaılastyń kim ekeni ázirge anyqtalǵan joq. https://kaz.inform.kz/news/andu-zhol-apatin-adey-uyimdastiru-zhane-adam-urlau-sotta-kolesnikov-snn-zhana-ma-654528f7

Aıyptaý nusqasy boıynsha, 20 qańtar kúni kúndiz Toyota Camry kóligi Erimbetov pen Rysqulov kósheleriniń qıylysynda Hyundai Sonata kóligimen qasaqana soqtyǵysqan. Osydan keıin jappaı tóbeles bastalyp, onyń barysynda Maqsat Kóshkenbaev pyshaqtan aýyr jaraqattanǵan.

Vasılıı Kolesnıkovty kúshtep kólikke otyrǵyzǵan. Nurmahan Eshanqulov ony alyp ketýge kedergi jasaýǵa tyrysqan. Onyń aıtýynsha, ol tapanshany kórip, qorqyp ketken soń shabýyl jasaǵandardyń birin jumys pyshaǵymen urǵan. Keıin sol adamnyń Álıhan Erimbet ekenin tanyǵan. Osydan keıin Kolesnıkovty Ordabasy aýdanynyń Qaınar aýylyna alyp ketken.

Tergeý nusqasy boıynsha, kóliktiń ishinde de ony uryp-soǵý jalǵasqan. Alǵan jaraqattarynyń saldarynan Vasılıı Kolesnıkov qaıtys bolǵan. Onyń denesi Temirlan aýylyndaǵy ortalyq aýdandyq aýrýhananyń avtoturaǵyna qaldyrylǵan. Marqumnyń artynda eki jasar qyzy qaldy.

Sottalýshylarǵa buzaqylyq, Maqsat Kóshkenbaevty óltirýge oqtalý, Vasılıı Kolesnıkovty urlaý jáne óltirý baptary boıynsha aıyp taǵylǵan.

Osy baptar boıynsha olarǵa 15 jyldan 20 jylǵa deıin bas bostandyǵynan aıyrý nemese múlkin tárkileýmen birge ómir boıyna bas bostandyǵynan aıyrý jazasy qarastyrylǵan.