Kóleńkeli eksport suıytylǵan gaz baǵasyn qymbattatýy múmkin – Bolat Aqsholaqov

NUR-SULTAN. QazAqparat – QR Energetıka mınıstri BolatAqsholaqovtyń málimeti boıynsha, kóleńkeli eksport suıytylǵan gaz baǵasyn qymbattatýy múmkin, dep habarlaıdy QazAqparat tilshisi.

«Memlekettik organdar tarapynan bólshek saýda baǵalaryn retteý tetiginiń bolmaýyna baılanysty suıytylǵan munaı gazy baǵasynyń ósý táýekelderi bar.

Kólem tapshylyǵynyń negizgi sebepteriniń biri kóleńkeli eksport bolyp tabylady. Bul keıinnen halyq úshin suıytylǵan munaı gazynyń jetispeýine jáne baǵanyń negizsiz ósýine alyp keledi. Qazirgi ýaqytta mınıstrliktiń ishki naryqtaǵy suıytylǵan munaı gazynyń aınalymy men kóleńkeli eksportqa jedel monıtorıng júrgizýge ókilettigi joq», - dedi vedomstvo basshysy Májiliste ótken Úkimet saǵatynda.

Mınıstr bul táýekelderdiń aldyn alý úshin birneshe shara qabyldanyp jatqanyn jetkizdi.

Olar:

- kólikke ilespe júkqujattaryn resimdeýge mindetti taýarlar tizbesine suıytylǵan munaı gazyn engizý;

- Qazaqstan aýmaǵynda avtogaz quıý stantsııalaryna baqylaý-kassalyq mashınalardyń bolýyna qoıylatyn talaptardy kúsheıtý;

- Energetıka mınıstrligine fıskaldyq derekter operatoryna jáne suıytylǵan munaı gazyn tasymaldaıtyn kólikterdiń ilespe júkqujattaryna qashyqtan qol jetkizýdi múmkindigin berý.

Sondaı-aq, Bolat Aqsholaqov 180 kún ótken soń suıytylǵan gaz baǵasyn qalaı retteıtinin aıtty.