Kóleńkeli ekonomıkamen kúres: Qandaı tetikter engizildi
«Kóleńkeli ekonomıkanyń úlesin qysqartýdyń jáne bıýdjetke salyqtyq túsimderdi ulǵaıtýdyń áserli quraldarynyń biri - ımporttan nemese óndiristen bastap ony túpkilikti satýǵa deıin taýar qozǵalysynyń úzilissiz monıtorıngin júrgizý. Bul monıtorıng júıesi taýarlardy jetkizýdiń tutas tizbegin baqylaı otyryp, taýarlarǵa baǵynyń qalyptasýyn taldaýǵa múmkindik beredi. Bul taýarlardy satý kezinde marja jáne tıisinshe salyqtardyń durys tólenýin anyqtaýǵa baǵyttalǵan», - dedi mınıstr.
Osy oraıda, úzdiksiz monıtorıng júıesi mynadaı jobalardy qamtıdy: «ASTANA-1» aqparattyq júıesi; «Taýarlardy tańbalaý» aqparattyq júıesi; «Elektrondyq shot-faktýralar» aqparattyq júıesi; «Vırtýaldy qoıma» modýli; Onlaın baqylaý-kassa mashınalary; Qosylǵan qun salyǵyn baqylaý shottaryn qoldana otyryp, qosylǵan qun salyǵyn ákimshilendirý.
«Búgingi tańda «ASTANA-1» júıesi shtattyq rejımde jumys istep tur. Budan basqa, úshinshi eldermen olardyń Qazaqstanǵa rásimdelgen eksporttyq kedendik deklaratsııalar boıynsha «ASTANA-1» aqparattyq júıesi arqyly aqparattyq almasý jumysy bastalýda. Bul osy elderden keletin taýarlardy baqylaýdy kúsheıtýge jáne kóleńkeli ekonomıkanyń kólemin aıtarlyqtaı tómendetýge múmkindik beredi», - dedi Á. Smaıylov.
Eske sala keteıik, «ASTANA-1» aqparattyq júıesi engizilgenge deıin kedendik broker keden organdaryna barlyq qujattardy, onyń ishinde kedendik deklaratsııanyń ózin de qaǵaz túrde ǵana usynǵan. Osyǵan baılanysty qujattardy óńdeý qolmen júrgizildi, bul kedendik rásimdeý protsesin qıyndatqan bolatyn.Tıisinshe, bıznes úshin bul ýaqyt jáne qarjy shyǵyndaryna sebep boldy.
«Búgingi kúnde biz «Astana-1» júıesiniń alǵashqy oń nátıjelerin kórip otyrmyz. Atap aıtqanda, syrtqy ekonomıkalyq qyzmetke qatysýshylardyń únemdeýi shamamen 77 mlrd teńgeni qurady jáne «jasyl dáliz» boıynsha rásimdeý ýaqyty 1 mınýtqa deıin qysqardy», - dedi vedomstvo basshysy.
