«Kóleńkeli» ekonomıkamen kúres: Barlyq salalarda jospar jańartylyp jatyr
«Bıýdjet protsesiniń ashyqtyǵyn qamtamasyz etý maqsatynda halyqaralyq áriptestermen jumystar júrgizilýde. 2019 jyldyń qorytyndysy boıynsha Qazaqstanǵa
58 ball berildi. Biz álemniń 117 eliniń arasynda 37-oryndamyz. Bul, eń aldymen, mınıstrlik saıtyn keńeıtý jáne paıdalanýshylar úshin jaǵdaıdy jaqsartý arqasynda múmkin boldy. Saıtta aqparattar, esepter, taldaý, bıýdjet boıynsha sholýlar ornalastyrylady. 2021 jyldyń qorytyndysy boıynsha bıýdjettiń ashyqtyǵy ındeksinde biz keminde 59 ball jınaýdy josparlap otyrmyz», - dedi E. Jamaýbaev Qarjy mınıstrliginiń alqa májilisinde.
Sonymen qatar ol salyqtyq-kedendik ákimshilendirýdi tsıfrlandyrý jáne «kóleńkeli» ekonomıka deńgeıin tómendetý baǵytyna toqtaldy.
«Bizdiń basym mindetimiz - kóleńkeli ekonomıkany Ekonomıkalyq yntymaqtastyq jáne damý uıymy elderiniń deńgeıine deıin tómendetý. Oǵan qarsy is-qımyl jónindegi 2019-2021 jyldarǵa arnalǵan jospar aıasynda qabyldanǵan sharalar onyń deńgeıin jalpy ishki ónimge 23,6 paıyzǵa deıin tómendetýge múmkindik berdi. Qazir ekonomıkanyń barlyq salalary men júıeleri boıynsha jospardy jańartý boıynsha jumys júrgizilip jatyr», - dedi E. Jamaýbaev.
Onyń aıtýynsha, bıýdjetti turaqty kiris kózderimen qamtamasyz etý jónindegi mindetti sheshýdi mınıstrlik salyqtyq-kedendik ákimshilendirýdi odan ári tsıfrlandyrý esebinen iske asyryp keledi.
«Tek sońǵy 3 jyldyń ózinde joǵaryda atalǵan sharalar bıýdjetke 2 trıllıon teńgeden astam, onyń ishinde 2020 jyly 710 mlrd teńge qosymsha túsimdi qamtamasyz etýge múmkindik berdi. Ózderińiz biletindeı, «kóleńkeli» ekonomıka kólemin qysqartý úshin 2021 jylǵy 1 qańtardan bastap jalpyǵa birdeı deklaratsııalaýdyń birinshi kezeńi engizildi. Osyǵan baılanysty keń aýqymdy túsindirý jumystaryn júrgizý josparlanyp otyr», - dedi vedomstvo basshysy.
