Kóleńkeli ekonomıkaǵa qarsy is-qımyl aıasynda qarjy monıtorıngine jatatyn sýbektiler tizbesi keńeıtiledi
ASTANA. QazAqparat - Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy.
Zań jobasynda kóleńkeli ekonomıkaǵa qarsy is-qımyl jasaý maqsatyndaǵy qarjy monıtorıngi sýbektileriniń tizbesin keńeıtý jónindegi sharalar kózdelgen. Sonymen qatar, qujatta zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyldyń quqyqtyq tetikterin jetildirý qarastyrylyp otyr.
Májilis depýtattary qujatty talqylaý barysynda «aqshamen jáne (nemese) ózge múlikpen kúmándi operatsııalar» degen uǵymdy ózgertý boıynsha túzetýler, sondaı-aq olardy anyqtaý rásimderin engizdi. Atap aıtqanda, «korrespondenttik qatynastar» jáne «benefıtsıarlyq menshik ıesi» degen uǵymdar naqtylandy. Klıentterdi (olardyń ókilderin) jáne benefıtsıarlyq menshik ıelerin tıisinshe tekserý sharalaryna, sondaı-aq ishki baqylaý qaǵıdalaryna qoıylatyn talaptar jetildirilip otyr.
Budan bólek, zań jobasymen qarjy monıtorıngi sýbektileri úshin klıentterdi tıisinshe baqylaý sharalaryn qoldaný múmkin bolmaǵan jaǵdaıda, jeke nemese zańdy tulǵalar iskerlik qatynastar ornatýdan bas tartý mindetin belgileý qarastyrylyp otyr.
Májilis maquldaǵan qujat Senattyń talqylaýyna joldanady.
